రాజ్‌భవన్‌కు చేరిన మాజీ మంత్రి జోగి రమేశ్ కుటుంబ వివాదం

మాజీ మంత్రి, వైఎస్సార్‌సీపీ నేత జోగి రమేశ్ కుటుంబ వివాదం మరో కీలక మలుపు తిరిగింది. ఆయన కోడలు మేఘన, ఏపీ గవర్నర్ అబ్దుల్ నజీర్‌ను కలిసి తన గోడు వెళ్లబోసుకున్నారు. తన భర్త, అత్తమామల నుంచి ప్రాణహాని ఉందని, తనకు తక్షణమే రక్షణ కల్పించాలని ఆమె గవర్నర్‌ను అభ్యర్థించారు. వరకట్న వేధింపులు, హత్యాయత్నం వంటి తీవ్ర ఆరోపణలతో ఆమె గవర్నర్‌కు ఫిర్యాదు చేయడం రాష్ట్రవ్యాప్తంగా చర్చనీయాంశమైంది.

విజయవాడలోని రాజ్‌భవన్‌లో గవర్నర్‌తో భేటీ అయిన మేఘన, తన అత్తమామలు అదనపు కట్నం కోసం తీవ్రంగా వేధిస్తున్నారని ఆరోపించారు. తన భర్త రాజీవ్, మామ జోగి రమేశ్, అత్త శకుంతల సహా కుటుంబ సభ్యులు తనపై పలుమార్లు హత్యాయత్నం చేశారని ఆమె ఫిర్యాదులో పేర్కొన్నట్లు తెలుస్తోంది. తన వాదనలు విన్న గవర్నర్, ఈ కేసును తెలంగాణకు బదిలీ చేసుకుంటే న్యాయపోరాటానికి సులభంగా ఉంటుందని సూచించినట్లు సమాచారం.

ఈ ఏడాది జులైలో మేఘన తొలిసారిగా ఇబ్రహీంపట్నం పోలీస్ స్టేషన్‌లో ఫిర్యాదు చేసిన విషయం తెలిసిందే. పెళ్లి సమయంలో తన కుటుంబం రూ.5 కోట్లు ఖర్చు చేసినప్పటికీ, అదనంగా మరో రూ.5 కోట్లు, కార్లు, ఆభరణాలు తీసుకురావాలని వేధిస్తున్నారని ఆమె ఆరోపించారు. గోవా పర్యటనలో పడవ నుంచి నీటిలోకి నెట్టేసి చంపేందుకు ప్రయత్నించారని కూడా ఆమె గతంలో ఆరోపించారు. దీంతో జోగి రమేశ్ సహా 11 మందిపై వరకట్న వేధింపులు, గృహ హింస, హత్యాయత్నం కింద కేసు నమోదైంది.

అయితే, ఈ ఆరోపణలను జోగి రమేశ్ కుటుంబం ఖండించింది. ఇది కేవలం కుటుంబ వివాదమని, దానికి రాజకీయ రంగు పులుముతున్నారని వారు పేర్కొన్నారు. ఈ కేసులో ఇప్పటికే కొందరు నిందితులు ముందస్తు బెయిల్ పొందారు.