మూసీ ప్రక్షాళనకు కౌంట్‌డౌన్.. దసరా రోజు తొలి దశ పనులకు శ్రీకారం!

హైదరాబాద్ వాసులు ఎంతోకాలంగా ఎదురుచూస్తున్న మూసీ నది పునరుజ్జీవన ప్రాజెక్టు పనులకు ముహూర్తం దాదాపు ఖరారైంది. ప్రభుత్వం ప్రతిష్ఠాత్మకంగా తీసుకున్న ఈ ప్రాజెక్టు తొలి దశ (ఫేజ్-1) పనులను దసరా పండుగ రోజున ప్రారంభించేందుకు ప్రభుత్వ యంత్రాంగం వేగంగా ఏర్పాట్లు చేస్తోంది. హైదరాబాద్ నగరానికి కొత్త అందాలు తీసుకువచ్చే ఈ ప్రాజెక్టుకు సంబంధించి అన్ని ప్రక్రియలను అధికారులు వేగవంతం చేశారు.

తొలి దశ పనుల కోసం రాష్ట్ర ప్రభుత్వం ఇప్పటికే రూ.7,345.12 కోట్లతో పరిపాలన అనుమతులు జారీ చేసింది. ఈ భారీ ప్రాజెక్టుకు అవసరమైన నిధులలో రూ.4,500 కోట్లను ఏషియన్ డెవలప్‌మెంట్ బ్యాంక్ (ఏడీబీ) నుంచి రుణంగా తీసుకోనున్నారు. మిగిలిన రూ.2,845.12 కోట్లను హెచ్‌ఎండీఏ, టీజీఐఐసీ సంస్థల ద్వారా సమకూర్చాలని ప్రభుత్వం నిర్ణయించింది. ఇప్పటికే అధికారులు ఫేజ్-1 సమగ్ర ప్రాజెక్టు నివేదికను (డీపీఆర్) ఏడీబీకి సమర్పించగా, రుణ మంజూరు ప్రక్రియ చివరి దశలో ఉన్నట్లు సమాచారం. దీంతో దసరా నాటికి శంకుస్థాపన చేసేందుకు రంగం సిద్ధమవుతోంది.

రెండు మార్గాల్లో అభివృద్ధి పనులు
మూసీ నది వాస్తవానికి అనంతగిరి కొండల్లో మూసా, ఈసీ అనే రెండు పాయలుగా పుడుతుంది. ఈసీ నదిపై హిమాయత్‌సాగర్, మూసా నదిపై ఉస్మాన్‌సాగర్ (గండిపేట) జలాశయాలు ఉన్నాయి. ఈ రెండు జలాశయాల నుంచి దిగువకు ప్రవహించి, లంగర్‌హౌజ్ సమీపంలోని బాపూఘాట్ వద్ద కలిసిపోయి మూసీ నదిగా ప్రవహిస్తుంది. ఫేజ్-1లో భాగంగా, హిమాయత్‌సాగర్ నుంచి బాపూఘాట్ వరకు 9.2 కిలోమీటర్లు, ఉస్మాన్‌సాగర్ నుంచి బాపూఘాట్ వరకు 11.8 కిలోమీటర్ల మేర అభివృద్ధి పనులు చేపట్టనున్నారు. ఈ రెండు పనులను ఒకేసారి పూర్తిచేసేలా ప్రణాళికలు రచిస్తున్నారు.

ఈ ప్రాజెక్టులో భాగంగా నదిలో పేరుకుపోయిన పూడిక, వ్యర్థాలను తొలగించడం, నీటిని నిల్వ చేసి బోటింగ్ వంటి సదుపాయాలు కల్పించడం, నదికి ఇరువైపులా సుందరమైన రోడ్లు, ల్యాండ్‌స్కేపింగ్, సైకిల్ ట్రాక్‌లు, ఫుట్ ఓవర్ బ్రిడ్జిలు నిర్మించనున్నారు. ముఖ్యంగా, నగరంలోని మురుగు నీరు నదిలో కలవకుండా ఇరువైపులా భారీ ట్రంక్ లైన్లు, వర్షపు నీటి డ్రెయిన్లను ఏర్పాటు చేయనున్నారు. ఫేజ్-1 పనులు ప్రారంభమైన తర్వాత, హైదరాబాద్ గేట్‌వే నిర్మాణ పనులపై దృష్టి సారిస్తామని అధికారులు చెబుతున్నారు. మరోవైపు, నాగోలు నుంచి గౌరెల్లి వరకు చేపట్టనున్న రెండో దశ (ఫేజ్-2) పనుల డీపీఆర్ తయారీ ప్రక్రియను కూడా వేగవంతం చేశారు.