సిబ్బందికి రూ. 42 లక్షల గిఫ్టులు.. ఉదారత చాటుకున్న డొనాల్డ్ ట్రంప్

అమెరికా అధ్యక్షుడు డొనాల్డ్ ట్రంప్ తన సిబ్బంది పట్ల అసాధారణ ఉదారతను చాటుకున్నారు. శ్వేతసౌధంలో తనతో అత్యంత సన్నిహితంగా పనిచేసే నలుగురు కీలక సహాయకులకు క్రిస్మస్ కానుకగా లక్షల డాలర్ల విలువైన బహుమతులను అందజేశారు. పరిపాలనా విభాగం విడుదల చేసిన వ్యయ నివేదికల ద్వారా ఈ విషయం వెలుగులోకి వచ్చింది.

ఈ వివరాల ప్రకారం.. ముగ్గురు సహాయకులకు తలా 45 వేల డాలర్ల (భారత కరెన్సీలో సుమారు రూ. 42 లక్షలు) విలువైన బహుమతులు లభించాయి. వీరిలో ఎగ్జిక్యూటివ్ అసిస్టెంట్ నటాలీ హార్ప్, కమ్యూనికేషన్స్ అడ్వైజర్ మార్గో మార్టిన్, ఓవల్ ఆఫీస్ ఆపరేషన్స్ డిప్యూటీ డైరెక్టర్ ఛాంబర్‌లైన్ హారిస్ ఉన్నారు. మరోవైపు, ఓవల్ ఆఫీస్ ఆపరేషన్స్ డైరెక్టర్ వాల్ట్ నౌటాకు 20 వేల డాలర్ల విలువైన కానుకను ట్రంప్ అందజేశారు.

క్రిస్మస్ వేళ ట్రంప్ 'శాంటా క్లాజ్'లా మారి తన సిబ్బందిని ఈ ఖరీదైన బహుమతులతో ఆశ్చర్యపరిచినట్లు నివేదికలు పేర్కొన్నాయి. అయితే, ఈ బహుమతులు పూర్తిగా ఆయన వ్యక్తిగతమైనవని, ప్రభుత్వ అధికారిక విధులతో వీటికి ఎటువంటి సంబంధం లేదని శ్వేతసౌధం అధికారులు స్పష్టం చేశారు. ఈ బహుమతుల ప్రదానం అంతా నైతిక నిబంధనలకు లోబడే జరిగిందని వారు వివరించారు.