'నువ్వెవరో నాకు తెలీదు.. కానీ నేనెవ‌రో ప్ర‌పంచం మొత్తానికి తెలుసు'.. బిగ్ బాస్ హౌస్‌లో మేరీ కోమ్ ఫైర్!

ప్రముఖ రియాలిటీ షో 'బిగ్ బాస్ 20' ప్రారంభమైన కొద్ది రోజులకే హౌస్‌లో గొడవలు మొదలయ్యాయి. ఆరుసార్లు ప్రపంచ ఛాంపియన్‌గా నిలిచిన బాక్సర్ మేరీ కోమ్, మరో కంటెస్టెంట్ రితి తివారీ మధ్య వంటగదిలో తీవ్ర వాగ్వాదం చోటుచేసుకుంది. దీనికి సంబంధించిన ప్రోమోను నిర్వాహకులు విడుదల చేయగా, ప్రస్తుతం ఇది సోషల్ మీడియాలో వైరల్ అవుతోంది.

ప్రోమో ప్రకారం, వంటగదిలో ఉన్న మేరీ కోమ్.. పాత్రలు కడిగే డ్యూటీ ఎవరిదని అడగడంతో గొడవ మొదలైంది. అక్కడే ఉన్న రితి తివారీ, ఆ డ్యూటీ తనదేనని, అయితే ప్రస్తుతం అందరి కోసం టీ పెడుతున్నానని సమాధానమిచ్చింది. దీనికి మేరీ కోమ్ స్పందిస్తూ, "టీ పెట్టడానికి ఎంత సమయం పడుతుంది?" అని ప్రశ్నించారు.

ఈ ప్రశ్నకు అసహనానికి గురైన రితి, అయితే మీరే టీ పెట్టండి అంటూ ఘాటుగా బదులిచ్చింది. "నాకేం చేయాలో నాకు తెలుసు. మీకు చాలా గౌరవం ఇస్తాను, కానీ నా వెనుక నా గురించి మాట్లాడొద్దు" అని మేరీ కోమ్‌కు స్పష్టం చేసింది. 

దీంతో కోపగించుకున్న మేరీ కోమ్.. "ప్రపంచం మొత్తానికి నేను తెలుసు. మీరెవరో నాకు తెలియదు" అని అన్నారు. దీనికి రితి కూడా గట్టిగానే బదులిస్తూ.. "మేరీ కోమ్ మరో కోణాన్ని కూడా త్వరలో ప్రపంచం చూస్తుంది" అని కౌంటర్ ఇచ్చింది.

సెప్టెంబర్ 6న ప్రారంభమైన బిగ్ బాస్ 20వ సీజన్‌లో మేరీ కోమ్, కనికా మాన్, మహీ విజ్, ఆమ్రపాలి దూబే, రితి తివారీ సహా మొత్తం 16 మంది సెలబ్రిటీలు పోటీ పడుతున్నారు. ఈ షో కలర్స్ టీవీ, జియోహోస్టార్‌లో ప్రసారం అవుతోంది.