ప్రజలు, టెక్నాలజీ, మూలధనంపై చైనా ఉక్కుపాదం.. విదేశాలకు వెళ్లడం కష్టమే!

ప్రజలు, మూలధనం, కీలక సాంకేతిక పరిజ్ఞానం దేశం దాటిపోకుండా చైనా ప్రభుత్వం తన పట్టును మరింత బిగిస్తోంది. ఈ క్రమంలోనే, దేశ పౌరులు విదేశాలకు వెళ్లడంపై కఠినమైన నిబంధనలను తీసుకువచ్చింది. పారిశ్రామిక, సాంకేతిక భద్రతకు ముప్పు వాటిల్లే అవకాశం ఉందని భావిస్తే, పౌరులను దేశం విడిచి వెళ్లకుండా నిరోధించేందుకు అధికారులకు అధికారం కల్పించే ఈ కొత్త నిబంధనలు సెప్టెంబర్ 15 నుంచి అమల్లోకి రానున్నాయి.

సున్నితమైన టెక్నాలజీ, డేటా, నైపుణ్యం కలిగిన నిపుణులు విదేశాలకు తరలిపోకుండా నిరోధించేందుకు చైనా ప్రభుత్వం తీసుకుంటున్న చర్యల్లో ఇది ఒక కీలక ముందడుగుగా భావిస్తున్నారు. చైనాకు చెందిన 'మనుస్' అనే ఏఐ స్టార్టప్‌ను 2 బిలియన్ డాలర్లతో కొనుగోలు చేసేందుకు మెటా చేసిన ప్రతిపాదనను చైనా అడ్డుకోవడమే ఇందుకు నిదర్శనం. జాతీయ భద్రత కారణాలను చూపుతూ ఈ ఏడాది ఏప్రిల్‌లో ఈ ఒప్పందాన్ని డ్రాగన్ సర్కార్ రద్దు చేసింది.

కొత్త నిబంధనల ప్రకారం, టెక్నాలజీ దిగుమతి లేదా ఎగుమతి నిబంధనలను ఉల్లంఘించి దేశ పారిశ్రామిక, సాంకేతిక భద్రతకు ప్రమాదం కలిగించే వారిని దేశం విడిచి వెళ్లకుండా నిరోధించవచ్చు. అంతేకాకుండా, విదేశాల్లో చైనా జాతీయ భద్రతకు, ప్రయోజనాలకు హాని కలిగించే నేరాలకు పాల్పడిన వారు దేశానికి తిరిగి వచ్చిన తర్వాత ఆరు నెలల నుంచి మూడేళ్ల వరకు విదేశాలకు వెళ్లకుండా నిషేధం ఎదుర్కోవలసి ఉంటుంది.

ఈ ఆంక్షలు కేవలం ప్రజలకే పరిమితం కాలేదు. దేశం నుంచి మూలధనం, వ్యూహాత్మక ఆస్తులు తరలిపోకుండా నిరోధించే ప్రయత్నాల్లో భాగంగానే ఈ చర్యలు తీసుకుంటున్నారు. ఒక వ్యక్తి ఏడాదికి 50,000 డాలర్ల కంటే ఎక్కువ విదేశీ మారకాన్ని కొనుగోలు చేయరాదనే నిబంధన ఇప్పటికే ఉంది. గతేడాది చైనా వాణిజ్య మిగులు రికార్డు స్థాయిలో 1.2 ట్రిలియన్ డాలర్లకు చేరడంతో, చైనా కంపెనీలు, వ్యక్తులు భారీగా విదేశీ ఆస్తులు, సెక్యూరిటీలలో పెట్టుబడులు పెడుతున్నారు. ఈ నేపథ్యంలో విదేశీ పెట్టుబడులపై ప్రభుత్వం నిఘాను మరింత కఠినతరం చేసింది.

ఇదేకాకుండా, చైనా స్టేట్ కౌన్సిల్ జూన్‌లో విడుదల చేసిన నిబంధనల ప్రకారం, పెట్టుబడిదారులు నియంత్రిత టెక్నాలజీ, డేటా, ఇతర నియంత్రిత వస్తువులు లేదా సేవలను విదేశీ పెట్టుబడుల ద్వారా ఎగుమతి చేయడాన్ని నిషేధించారు. నిబంధనలు ఉల్లంఘించిన వారికి జరిమానాలు, వీసా ఆంక్షలు, ఇండస్ట్రీ బ్లాక్‌లిస్టింగ్ వంటి శిక్షలు విధించనున్నారు.