ఇరాన్‌పై అమెరికా ప్రతీకార దాడులు.. మళ్లీ పెరిగిన ఉద్రిక్తతలు

అమెరికా, ఇరాన్ మధ్య ఉద్రిక్తతలు మరోసారి తీవ్రస్థాయికి చేరుకున్నాయి. ఇరాన్‌కు చెందిన ఇస్లామిక్ రివల్యూషనరీ గార్డ్ కార్ప్స్ (ఐఆర్‌జీసీ) స్థావరాలే లక్ష్యంగా అమెరికా సైన్యం తాజాగా దాడులు చేపట్టింది. ఈ దాడులు జరిపినట్లు అమెరికా సెంట్రల్ కమాండ్ 'ఎక్స్' వేదికగా అధికారికంగా వెల్లడించింది. ఈ పరిణామంతో పశ్చిమాసియాలో మరోసారి యుద్ధ మేఘాలు కమ్ముకున్నాయి.

హర్మూజ్ జలసంధిలో వాణిజ్య నౌకలపై, పశ్చిమాసియాలోని తమ సైనిక స్థావరాలపై ఇరాన్ సాగిస్తున్న దాడులకు ప్రతీకారంగానే ఈ చర్యలు తీసుకున్నట్లు అమెరికా స్పష్టం చేసింది. దాదాపు నెల రోజుల విరామం తర్వాత ఇరు దేశాల మధ్య దాడులు పునఃప్రారంభమయ్యాయి.

రెండు రోజుల క్రితం అమెరికా దళాలు ఇరాన్‌కు చెందిన రాకెట్ లాంచర్లను ధ్వంసం చేయగా, దానికి ప్రతిచర్యగా జోర్డాన్‌లోని అమెరికా సైనిక స్థావరంపై ఇరాన్ బాలిస్టిక్ క్షిపణులతో దాడికి పాల్పడింది. ఈ పరిణామంపై ఆగ్రహం వ్యక్తం చేసిన అమెరికా, తాజాగా ఐఆర్‌జీసీ స్థావరాలే లక్ష్యంగా దాడులను ముమ్మరం చేసింది. ఈ పరస్పర దాడుల నేపథ్యంలో ఇరు దేశాల మధ్య ఉద్రిక్తతలు మరింత పెరిగే అవకాశం ఉందని అంతర్జాతీయ విశ్లేషకులు ఆందోళన వ్యక్తం చేస్తున్నారు.