ఉక్రెయిన్‌లో విషాద ఘటన: రష్యా దాడుల్లో భారతీయ పౌరుడి మృతి

ఉక్రెయిన్‌లో విషాద ఘటన చోటుచేసుకుంది. రష్యా చేపట్టిన భీకర దాడుల్లో ఒక భారతీయ పౌరుడు ప్రాణాలు కోల్పోయారు. ఈ విషయాన్ని ఉక్రెయిన్ అధ్యక్షుడు జెలెన్‌స్కీ స్వయంగా ధ్రువీకరించారు. గత ఐదు రోజులుగా రష్యా సాగిస్తున్న దాడుల్లో మొత్తం 12 మంది మరణించారని, వారిలో ఒకరు భారతీయుడని ఆయన వెల్లడించారు.

గత ఐదు రోజులుగా రష్యా డ్రోన్లు, క్షిపణులతో దాడులను తీవ్రతరం చేసిందని జెలెన్‌స్కీ 'ఎక్స్' వేదికగా తెలిపారు. కీవ్, ఖేర్సన్, డొనెట్స్క్, జపోరిజియా సహా పలు కీలక ప్రాంతాలపై ఈ దాడులు జరిగాయని పేర్కొన్నారు. రష్యా ఉద్దేశపూర్వకంగానే పౌరులను లక్ష్యంగా చేసుకుంటోందని ఆయన ఆరోపించారు. తమకు గగనతల రక్షణ వ్యవస్థలు తగినన్ని లేవని, ఈ విషయంలో అంతర్జాతీయ సమాజం సాయం చేయాలని విజ్ఞప్తి చేశారు. అయితే, మరణించిన భారతీయ పౌరుడి వివరాలను గానీ, అతను ఎక్కడ మరణించాడనే అంశాన్ని గానీ అధ్యక్షుడు వెల్లడించలేదు.

ఈ ఘటనపై కీవ్‌లోని భారత రాయబార కార్యాలయం తీవ్ర విచారం వ్యక్తం చేస్తూ, మృతుడి కుటుంబ సభ్యులకు ప్రగాఢ సానుభూతిని తెలిపింది. భౌతికకాయాన్ని వీలైనంత త్వరగా స్వదేశానికి తరలించేందుకు అవసరమైన అన్ని రకాల సహాయ సహకారాలను అందిస్తున్నట్లు స్పష్టం చేసింది. ఈ దిశగా మృతుడి కుటుంబం, అతను పనిచేస్తున్న సంస్థ, అలాగే ఉక్రెయిన్ అధికారులతో నిరంతరం సంప్రదింపులు జరుపుతున్నట్లు రాయబార కార్యాలయం వెల్లడించింది.