నష్టాల్లో ముగిసిన స్టాక్‌ మార్కెట్లు.. 24,100 దిగువకు నిఫ్టీ

దేశీయ స్టాక్‌ మార్కెట్‌ సూచీలు సోమవారం నష్టాల్లో ముగిశాయి. అంతర్జాతీయ మార్కెట్ల నుంచి ప్రతికూల సంకేతాలు రావడంతో పాటు ఐటీ, మెటల్‌, రియల్టీ, మీడియా షేర్లలో అమ్మకాల ఒత్తిడి కనిపించింది. దీంతో కీలక సూచీలు దిగువకు జారాయి.

సెన్సెక్స్‌ 307.24 పాయింట్లు నష్టపోయి 76,957.27 వద్ద స్థిరపడింది. నిఫ్టీ 95.25 పాయింట్లు క్షీణించి 24,080.40 వద్ద ముగిసింది. నిఫ్టీలో ఐటీసీ, భారతీ ఎయిర్‌టెల్‌, ఎటర్నల్‌ షేర్లు అత్యధికంగా నష్టపోయాయి. ఐటీ, మెటల్‌, రియల్టీ, మీడియా రంగాల సూచీలు మార్కెట్‌పై ఒత్తిడి పెంచాయి. 

మరోవైపు ఆటో, ప్రైవేట్‌ బ్యాంక్‌ రంగాలు కొంత మద్దతు అందించాయి. నిఫ్టీ మిడ్‌క్యాప్‌ సూచీ 0.24 శాతం లాభపడగా.. నిఫ్టీ స్మాల్‌క్యాప్‌ సూచీ 0.74 శాతం నష్టపోయింది.

సమీప కాలంలో నిఫ్టీ 24,180-24,200 స్థాయుల వరకు స్వల్పంగా పుంజుకునే అవకాశం ఉందని మార్కెట్‌ నిపుణులు అంచనా వేస్తున్నారు. అయితే ఆ స్థాయుల వద్ద అమ్మకాల ఒత్తిడి ఎదురయ్యే అవకాశం ఉందని చెబుతున్నారు. 24,200పై స్థిరంగా నిలిస్తే మరో 100 పాయింట్ల వరకు పెరిగే అవకాశం ఉందని విశ్లేషకులు పేర్కొన్నారు. దిగువన 23,990 కీలక మద్దతు స్థాయిగా ఉంది. అది కిందికి జారితే మార్కెట్‌లో దిద్దుబాటు మరింత కొనసాగే అవకాశం ఉందని తెలిపారు.

అమెరికా-ఇరాన్‌ మధ్య పెరుగుతున్న ఉద్రిక్తతలు మదుపరుల్లో ఆందోళన పెంచాయి. దౌత్యపరమైన పరిష్కారంపై ఆశలు తగ్గడంతో ముడి చమురు ధరలు, ప్రపంచ బాండ్‌ ఈల్డ్స్‌ పెరిగాయి. దీంతో ఇంధన ఆధారిత ద్రవ్యోల్బణం, అధిక వడ్డీ రేట్లపై మళ్లీ ఆందోళనలు మొదలయ్యాయి. ఇవి కంపెనీల ఆదాయాలపై ప్రభావం చూపొచ్చని నిపుణులు చెబుతున్నారు.