హీరోయిన్ల స్కిన్ షోపై మోనాలిసా వ్యాఖ్యలు.. ప్రజెంటేషనే ముఖ్యం!

సినిమా పరిశ్రమలో కథానాయికలను వస్తువులుగా (ఆబ్జెక్టిఫికేషన్) చూపించడంపై జరుగుతున్న చర్చలో ప్రముఖ భోజ్‌పురి నటి మోనాలిసా తన గళం విప్పారు. స్కిన్ షో కన్నా దాన్ని తెరపై ఎలా ప్రదర్శిస్తున్నారన్నదే ముఖ్యమని ఆమె అభిప్రాయపడ్డారు. హిందీ చిత్రాలతో పోలిస్తే ప్రాంతీయ భాషా చిత్రాల్లో కొన్నిసార్లు ఈ విషయంలో సౌందర్యాత్మక చిత్రీకరణ లోపిస్తుందని ఆమె అన్నారు. ఐఏఎన్ఎస్‌ వార్తా సంస్థతో ప్రత్యేకంగా మాట్లాడుతూ మోనాలిసా ఈ వ్యాఖ్యలు చేశారు.

"హిందీ సినిమాల్లో కూడా స్కిన్ షో ఉంటుంది. కానీ, దాన్ని చిత్రీకరించే విధానం చాలా కళాత్మకంగా, అందంగా ఉంటుంది. ఆ ప్రజెంటేషన్ కారణంగా చూసే ప్రేక్షకులకు అది తప్పుగా అనిపించకపోవచ్చు" అని మోనాలిసా వివరించారు. ఇదే సమయంలో ప్రాంతీయ చిత్రాల గురించి మాట్లాడుతూ, ముఖ్యంగా భోజ్‌పురి పరిశ్రమలో కొన్నిసార్లు ఆ విధమైన సౌందర్యాత్మకత కొరవడుతుందని ఆమె అంగీకరించారు. "నడుము లేదా మరికొంత స్కిన్ చూపించాలనుకున్నప్పుడు దాన్ని అందంగా, కళాత్మకంగా చిత్రీకరిస్తే వచ్చే అనుభూతి వేరుగా ఉంటుంది. కానీ ప్రాంతీయ సినిమాల్లో ఆ ట్రీట్మెంట్ కొన్నిసార్లు లోపిస్తుందని నేను చెప్పగలను" అని ఆమె తెలిపారు.

సినిమాల్లో మహిళల పాత్రలను తెరపై చూపించేటప్పుడు ప్రజెంటేషన్‌కు ఎంతో ప్రాధాన్యత ఉంటుందని మోనాలిసా స్పష్టం చేశారు. "అందుకే, నా అభిప్రాయం ప్రకారం ప్రజెంటేషన్ చాలా ముఖ్యం," అని ఆమె ముగించారు.

ఇటీవల రామ్ చరణ్, జాన్వీ కపూర్ జంటగా నటించిన "పెద్ది" చిత్రంలోని కొన్ని సన్నివేశాలపై తీవ్ర విమర్శలు వెల్లువెత్తిన సంగతి తెలిసిందే. ఆ చిత్రంలో కథానాయిక అచియమ్మ పాత్రను అతిగా శృంగారభరితంగా, వస్తువుగా చూపించారని సోషల్ మీడియాలో పెద్ద ఎత్తున చర్చ జరిగింది. ముఖ్యంగా, కెమెరాను పదేపదే జాన్వీ నడుము, ఎద భాగాలపై ఫోకస్ చేయడం, కథానాయకుడు ఆమె అనుమతి లేకుండా ముద్దుపెట్టుకోవడం వంటి సన్నివేశాలు వివాదానికి దారితీశాయి. మహిళల పాత్రల చిత్రీకరణపై ఆందోళన వ్యక్తం చేస్తూ పలువురు సినీ ప్రముఖులు కూడా స్పందించారు. ఈ నేపథ్యంలో మోనాలిసా చేసిన వ్యాఖ్యలు ప్రాధాన్యం సంతరించుకున్నాయి.