డిజిటల్ చెల్లింపుల్లో దుమ్మురేపిన రంగారెడ్డి.. దేశంలోనే నాలుగో స్థానం!

రాష్ట్ర ఆర్థిక వ్యవస్థలో కీలకమైన రంగారెడ్డి జిల్లా, డిజిటల్ చెల్లింపుల రంగంలోనూ తన ఆధిపత్యాన్ని ప్రదర్శిస్తోంది. ఐటీ, ఫార్మా, ఏరోస్పేస్‌ వంటి పరిశ్రమలకు కేంద్రంగా ఉన్న ఈ జిల్లా, యూపీఐ లావాదేవీల్లో దేశంలోనే అగ్రగామి జిల్లాల్లో ఒకటిగా నిలిచింది. రిజర్వు బ్యాంక్ ఆఫ్ ఇండియా (ఆర్బీఐ) తాజాగా విడుదల చేసిన గణాంకాల ప్రకారం.. గత జులై నెలలో రంగారెడ్డి జిల్లాలో రూ.35,118.87 కోట్ల విలువైన యూపీఐ లావాదేవీలు జరిగాయి. ఈ ఘనతతో దేశంలోనే నాలుగో అతిపెద్ద కేంద్రంగా నిలిచింది.

ఈ జాబితాలో కర్ణాటకలోని బెంగుళూరు అర్బన్ జిల్లా రూ.96,153.36 కోట్ల లావాదేవీలతో అగ్రస్థానంలో ఉండగా, మహారాష్ట్రకు చెందిన ముంబై సబ్‌అర్బన్‌ (రూ.61,755.96 కోట్లు), పుణె (రూ.51,264.87 కోట్లు) జిల్లాలు రెండు, మూడు స్థానాలను దక్కించుకున్నాయి. రంగారెడ్డి తర్వాత చెన్నై (రూ.31,849.98 కోట్లు) ఐదో స్థానంలో నిలిచింది. తెలంగాణ నుంచే మేడ్చల్‌-మల్కాజ్‌గిరి (రూ.31,747.90 కోట్లు), హైదరాబాద్‌ (రూ.24,939 కోట్లు) జిల్లాలు సైతం వరుసగా ఆరు, ఎనిమిదో స్థానాల్లో ఉండటం విశేషం.

'ఫోన్‌పే' వినియోగంలోనూ అదరగొట్టిన రంగారెడ్డి జిల్లా 
ఇదే క్రమంలో ప్రముఖ డిజిటల్ పేమెంట్ యాప్ 'ఫోన్‌పే' వినియోగంలోనూ రంగారెడ్డి జిల్లా అదరగొట్టింది. గత త్రైమాసికంలో ఒక్క ఫోన్‌పే ద్వారానే రూ.1.04 లక్షల కోట్ల విలువైన లావాదేవీలు జరిపి దేశంలోనే మూడో స్థానాన్ని కైవసం చేసుకుంది. జిల్లాలో విస్తరిస్తున్న పారిశ్రామిక, సేవా రంగాలు డిజిటల్ ఆర్థిక వ్యవస్థ వృద్ధికి దోహదం చేస్తున్నాయని ఈ గణాంకాలు స్పష్టం చేస్తున్నాయి.