ఎలాన్ మస్క్ కంపెనీకి షాక్.. ‘గ్రాక్’ ఏఐపై కాలిఫోర్నియా కోర్టులో దావా

ఎలోన్ మస్క్‌కు చెందిన ఆర్టిఫిషియల్ ఇంటెలిజెన్స్ (ఏఐ) సంస్థ ‘ఎక్స్ఏఐ’, దాని ఏఐ సాధనం ‘గ్రాక్’ అమెరికాలో తీవ్రమైన న్యాయపరమైన చిక్కులను ఎదుర్కొంటున్నాయి. గ్రాక్ ఏఐని ఉపయోగించి అభ్యంతరకర, అశ్లీల చిత్రాలను సృష్టిస్తున్నారంటూ కాలిఫోర్నియా ఫెడరల్ కోర్టులో తాజాగా ఒక దావా దాఖలైంది.

బాల్యంలో లైంగిక వేధింపులకు గురైన ఒక అమెరికన్ మహిళ ఈ కేసు వేశారు. గత 20 ఏళ్లుగా ఆన్‌లైన్‌లో అందుబాటులో ఉన్న తన పాత ఫొటోలను ఉపయోగించి, కొందరు వినియోగదారులు ‘గ్రాక్’ ద్వారా అభ్యంతరకర చిత్రాలను రూపొందించి పంచుకుంటున్నారని ఆమె తన పిటిషన్‌లో ఆరోపించారు. కెనడియన్ సెంటర్ ఫర్ చైల్డ్ ప్రొటెక్షన్ సైతం గ్రాక్‌తో ముడిపడి ఉన్న ఇటువంటి కంటెంట్‌ను గుర్తించినట్లు ఆమె పేర్కొన్నారు. ఈ అంశంపై జ్యూరీ విచారణ జరపాలని ఆమె కోర్టును అభ్యర్థించారు.

ఇమేజ్ జనరేషన్ ఫీచర్‌పై ఎలోన్ మస్క్ చేసిన ఒక బహిరంగ ప్రకటన తర్వాత గత ఏడాది డిసెంబర్ చివరి నుంచి ఇటువంటి ఏఐ కంటెంట్ సృష్టి విపరీతంగా పెరిగిందని ఫిర్యాదులో పేర్కొన్నారు. కేవలం 11 రోజుల వ్యవధిలోనే గ్రాక్ ద్వారా 30 లక్షలకు పైగా ఇటువంటి కంటెంట్ సృష్టించబడగా, అందులో 23,000కు పైగా చిత్రాలు చిన్నారులకు సంబంధించినవిగా ఉన్నాయని ఆరోపించారు.

ఈ వివాదం తలెత్తిన తర్వాత, ఎక్స్ఏఐ ఈ ఫీచర్‌ను పూర్తిగా నిలిపివేయకుండా, కేవలం సబ్‌స్క్రైబర్లకు మాత్రమే పరిమితం చేసిందని పిటిషన్‌లో వివరించారు. ఓపెన్ఏఐ, మెటా వంటి సంస్థలు ఇటువంటి రిక్వెస్ట్‌లను బ్లాక్ చేస్తుండగా, ఎక్స్ఏఐ మాత్రం అందుకు భిన్నంగా వ్యవహరించిందని విమర్శించారు. అమెరికా చట్టాల ప్రకారం, బాలల అశ్లీల చిత్రాల బాధితులు ప్రతి ఉల్లంఘనకు కనీసం 1,50,000 డాలర్ల నష్టపరిహారం కోరవచ్చు. ఈ ఆరోపణలపై ఎక్స్ఏఐ సంస్థ ఇప్పటివరకు అధికారికంగా స్పందించలేదు.