ప్రపంచ అనిశ్చితితో స్టాక్‌ మార్కెట్‌ డౌన్‌.. 183 పాయింట్ల నష్టంలో సెన్సెక్స్‌

అంతర్జాతీయ పరిణామాలపై మదుపర్లు అప్రమత్తంగా వ్యవహరించడంతో దేశీయ స్టాక్‌ మార్కెట్లు బుధవారం నష్టాల్లో ముగిశాయి. ఐటీ, ఎఫ్‌ఎంసీజీ, ఆటో షేర్లలో అమ్మకాలతో సూచీలపై ఒత్తిడి పెరిగింది.

సెన్సెక్స్‌ 183.15 పాయింట్లు నష్టపోయి 77,472.94 వద్ద ముగిసింది. నిఫ్టీ 126.80 పాయింట్లు తగ్గి 24,207.75 వద్ద స్థిరపడింది. నిఫ్టీకి 24,400 స్థాయి కీలక నిరోధంగా ఉందని నిపుణులు తెలిపారు. ఈ స్థాయిని నిలకడగా దాటితే 24,500-24,600 వరకు పెరిగే అవకాశం ఉందన్నారు. అప్పటివరకు పైస్థాయుల్లో అమ్మకాల ఒత్తిడి కొనసాగే అవకాశముందని చెప్పారు.

24,200 వద్ద నిఫ్టీకి తక్షణ మద్దతు ఉందని పేర్కొన్నారు. 24,100-24,000 ప్రాంతం బలమైన మద్దతుగా ఉంటుందని తెలిపారు. 24,150 కంటే దిగువకు నిఫ్టీ బలంగా పడిపోతే అమ్మకాలు మరింత పెరిగి 24,000 స్థాయికి చేరే అవకాశం ఉందన్నారు.

నిఫ్టీ షేర్లలో భారతీ ఎయిర్‌టెల్‌, పవర్‌గ్రిడ్‌, ఇన్ఫోసిస్‌ నష్టాల్లో నిలిచాయి. రంగాల వారీగా ఐటీ సూచీ అత్యధికంగా పడిపోయింది. ఎఫ్‌ఎంసీజీ, ఆటో, రియల్టీ రంగాలు కూడా వెనుకంజ వేశాయి. మరోవైపు మెటల్‌, ప్రైవేట్‌ బ్యాంక్‌, సిమెంట్‌ సూచీలు మెరుగ్గా రాణించాయి. నిఫ్టీ మిడ్‌క్యాప్‌ సూచీ 0.1 శాతం తగ్గగా, నిఫ్టీ స్మాల్‌క్యాప్‌ సూచీ 0.81 శాతం లాభపడింది.

రానున్న రోజుల్లో ఎన్విడియా ఫలితాలు, అమెరికా ద్రవ్యోల్బణ గణాంకాలపై మదుపర్లు దృష్టి పెట్టనున్నారు. సాంకేతిక షేర్లు, వడ్డీ రేట్లు, ప్రపంచ మార్కెట్లలో రిస్క్‌ తీసుకునే ధోరణిపై వీటి ప్రభావం ఉండొచ్చని నిపుణులు తెలిపారు. పశ్చిమాసియా పరిణామాలు కూడా కీలకంగా మారనున్నాయి. ముడిచమురు ధరలు, ద్రవ్యోల్బణంపై వాటి ప్రభావాన్ని మార్కెట్లు గమనించనున్నాయి.