ఫ్లోరిడా తీరంలో అద్భుతం... సముద్ర గర్భంలో 'క్యాసినో' నౌక!

అమెరికాలోని ఫ్లోరిడా తీరంలో ఒక వినూత్న ప్రయోగానికి శ్రీకారం చుట్టారు. గతంలో వ్యర్థాలను తరలించేందుకు వినియోగించిన 324 అడుగుల పొడవైన భారీ ట్యాంకర్‌ను ఉద్దేశపూర్వకంగా సముద్రంలో ముంచి, దానిని ఒక అద్భుతమైన కళాఖండంగా తీర్చిదిద్దారు. పొంపానో బీచ్ సమీపంలో మునిగిన ఈ నౌకకు 'లేడీ లక్' అని నామకరణం చేసి, నీటి అడుగున క్యాసినో థీమ్‌తో కూడిన ఒక కృత్రిమ పగడపు దిబ్బగా మార్చారు.

స్థానిక కళాకారుడు డెన్నిస్ మెక్‌డొనాల్డ్ తన బృందంతో కలిసి కేవలం రెండు నెలల్లో స్వల్ప వ్యవధిలోనే ఈ నౌకకు సరికొత్త రూపునిచ్చారు. నౌక లోపల పోకర్ టేబుళ్లు, నకిలీ స్లాట్ మెషీన్లు, భారీ సొరచేపల విగ్రహాలు, ఒక జలకన్యతో పాటు పేకాట ఆడుతున్న ఆక్టోపస్ శిల్పాలను ఏర్పాటు చేశారు. నౌకలోని పాత వాల్వులు, స్ప్రింగులు వంటి విడిభాగాలనే ఈ శిల్పాల తయారీకి వినియోగించడం విశేషం. ఈ నౌక 'షిప్‌రెక్ పార్క్'లో అంతర్భాగం కాగా, ఇక్కడ మొత్తం 15 నౌకలు ఉన్నాయి.

పర్యాటకాన్ని ప్రోత్సహించడంతో పాటు సముద్ర జీవులకు కొత్త ఆవాసాన్ని కల్పించడమే ఈ ప్రాజెక్టు ప్రధాన ఉద్దేశం. ఈ కృత్రిమ పగడపు దిబ్బ ఏర్పాటు ద్వారా సహజసిద్ధమైన పగడపు దిబ్బలపై పర్యాటకుల ఒత్తిడి తగ్గుతుందని నిపుణులు భావిస్తున్నారు. ఈ 'లేడీ లక్' నౌక ఏడాదికి సుమారు 35,000 మంది డైవర్లను ఆకర్షిస్తుందని అంచనా వేస్తున్నారు. గుర్తింపు పొందిన డైవర్లు ఉచితంగానే ఈ నీటి అడుగున ఉన్న క్యాసినోను సందర్శించవచ్చు. నౌకను నియంత్రిత పద్ధతిలో ముంచేందుకు ముందుగానే రంధ్రాలు చేసి, తగిన జాగ్రత్తలు తీసుకున్నారు.