పిల్లలు మీకు అర్థం కారు.. థెరపీ తీసుకోండి అంకుల్ అంటూ ప్రధానిపై బాలీవుడ్ దర్శకుడి సెటైర్లు!

స్వాతంత్ర్య దినోత్సవం సందర్భంగా ఎర్రకోట వేదికగా ప్రధాని నరేంద్ర మోదీ చేసిన 'దిమాగీ నక్సల్' (మేధో నక్సల్) వ్యాఖ్యలపై ప్రముఖ సినీ దర్శకుడు అనురాగ్ కశ్యప్ తీవ్రంగా స్పందించారు. యువతపై రాజకీయ ముద్రలు వేయడం కన్నా, వారికి విద్యాబుద్ధులు నేర్పడం, విమర్శనాత్మక ఆలోచనలను ప్రోత్సహించడం, అవసరమైతే థెరపీ ద్వారా వారిని అర్థం చేసుకోవడం ముఖ్యమని ఆయన అభిప్రాయపడ్డారు. ఈ వ్యాఖ్యలు సోషల్ మీడియాలో పెద్ద చర్చకు దారితీశాయి.

సోషల్ మీడియా వేదికగా ప్రధాని వ్యాఖ్యలపై అనురాగ్ కశ్యప్ స్పందిస్తూ, నేటి రాజకీయ భాష యువతరం ఆందోళనలను, వారి ఆలోచనా విధానాన్ని ప్రతిబింబిస్తోందా అని ప్రశ్నించారు. "ఈ పెద్దవాళ్లకు ఇప్పటి పిల్లలు అస్సలు అర్థం కారు. 'దిమాగీ నక్సల్' అనగానే ఏదో బ్రహ్మాస్త్రం ప్రయోగించామని అనుకుంటున్నారు. అంకుల్.. ఇప్పటి పిల్లలకు నక్సల్ అంటే ఏంటో కూడా తెలియదు. ముందుగా పుస్తకాల్లోంచి తొలగించిన పాఠ్యాంశాలను మళ్లీ చేర్చండి. కానీ దాని కోసం స్కూళ్లను బాగుచేయాలి, టీచర్లను నియమించాలి" అని ఆయన తన పోస్టులో పేర్కొన్నారు.

అంతటితో ఆగకుండా, నేటి తరాన్ని అర్థం చేసుకోవడానికి పాలకులకు కొన్ని సలహాలు కూడా ఇచ్చారు. "నా సలహా ఏంటంటే.. కాస్త థెరపీ తీసుకోండి. అది చాలా అవసరం. ఆ తర్వాత వాళ్లని ప్రభావితం చేయాలంటే జెన్-జెడ్ (Gen Z) భాష కూడా నేర్చుకోవాలి. దాని కోసం మీరు కూడా చదువుకోవాలి" అంటూ వ్యంగ్యాస్త్రాలు సంధించారు.

ఆ తర్వాత తన ఇన్‌స్టాగ్రామ్ స్టోరీలో మరోసారి విమర్శలు గుప్పించారు. ఈసారి ఆన్‌లైన్ ట్రోల్స్‌ను ఉద్దేశించి.. "ఈసారి నా పోస్టుపై వెయ్యి మందికి పైగా ట్రోల్స్ రాలేదు. బహుశా ప్రభుత్వ ఐటీ సెల్ ఆర్థిక పరిస్థితి బాగాలేనట్టుంది. ప్రపంచ బ్యాంకు నుంచి మరికొంత అప్పు తీసుకోవాలేమో" అంటూ సెటైర్ వేశారు.

ప్రధాని మోదీ ఏమన్నారంటే?
స్వాతంత్ర్య దినోత్సవ ప్రసంగంలో ప్రధాని మోదీ మాట్లాడుతూ.. 'దిమాగీ నక్సల్స్' రూపంలో కొత్త సవాళ్లు ఎదురవుతున్నాయని హెచ్చరించారు. వీరు సమాజంలో హింసను, అరాచకత్వాన్ని ప్రోత్సహించడానికి కొత్త మార్గాలను అన్వేషిస్తున్నారని అన్నారు. "ఈ మేధో నక్సల్స్ రకరకాల ఎత్తుగడలతో సమాజాన్ని తప్పుదోవ పట్టించే ప్రయత్నం చేస్తున్నారు. వీరిని గుర్తించి, ఏకాకులను చేయాలి. తద్వారా దేశ యువతను వికసిత భారత్ నిర్మాణంలో భాగస్వాములను చేయాలి" అని ప్రధాని పిలుపునిచ్చారు. అడవుల్లో పనిచేసే సాయుధ నక్సల్స్‌కు, అధికార వ్యవస్థల్లో ఉండే ఈ 'దిమాగీ నక్సల్స్‌'కు మధ్య తేడాను ఆయన స్పష్టంగా వివరించారు. వీరిని గుర్తించడం ద్వారానే యువతను ప్రధాన స్రవంతిలో కలపగలమని ఆయన అభిప్రాయపడ్డారు.