ఆలయ గర్భగుడిలో మైనర్‌పై అఘాయిత్యం.. పూజారిని పట్టుకున్న స్థానికులు!

పవిత్రమైన ఆలయ గర్భగుడిలోనే ఓ మైనర్ బాలికపై వృద్ధ పూజారి లైంగిక దాడికి పాల్పడినట్లు వచ్చిన ఆరోపణలు తీవ్ర కలకలం రేపుతున్నాయి. బాలికతో అసభ్యంగా ప్రవర్తిస్తున్న పూజారిని స్థానికులు రెడ్‌హ్యాండెడ్‌గా పట్టుకుని పోలీసులకు అప్పగించారు. సైబరాబాద్ పోలీస్ కమిషనరేట్ పరిధిలోని రామచంద్రాపురంలో అత్యంత దారుణమైన ఘటన వెలుగులోకి వచ్చింది. ఈ ఘటనకు సంబంధించిన వీడియో సోషల్ మీడియాలో వైరల్ కావడంతో విషయం వెలుగులోకి వచ్చింది.

వివరాల్లోకి వెళితే.. రామచంద్రాపురంలోని ఓ ఆలయంలో అర్చకుడిగా పనిచేస్తున్న సాయన్న అనే వృద్ధుడు, ఓ మైనర్ బాలికతో గర్భగుడిలో అనుచితంగా ప్రవర్తిస్తున్నట్లు స్థానికులు గుర్తించారు. ఆ సమయంలో ఆలయానికి బయట నుంచి తాళం వేసి ఉండటంతో వారికి అనుమానం బలపడింది. వెంటనే అప్రమత్తమైన స్థానికులు, గ్రామ పెద్దలు కలిసి ఆలయ తలుపులు తెరిచి చూడగా, బాలికతో పూజారి అసభ్యకరంగా ప్రవర్తిస్తూ కనిపించాడు. ఆగ్రహానికి గురైన వారు అతడిని పట్టుకుని పోలీసులకు సమాచారం అందించారు.

సమాచారం అందుకున్న రామచంద్రాపురం పోలీసులు వెంటనే ఘటనా స్థలానికి చేరుకున్నారు. బాలికను రక్షించి, నిందితుడు సాయన్నను అదుపులోకి తీసుకున్నారు. బాధితురాలు మైనర్ కావడంతో ఆమె వివరాలను గోప్యంగా ఉంచి, కేసు నమోదు చేసి దర్యాప్తు ప్రారంభించారు. ఆలయం వంటి పవిత్ర ప్రదేశంలో ఇలాంటి ఘటన జరగడంపై స్థానికులు తీవ్ర ఆగ్రహం వ్యక్తం చేస్తున్నారు. గతంలో కూడా ఈ ఆలయ ప్రాంగణంలో కొన్ని అసాంఘిక కార్యకలాపాలు జరుగుతున్నాయని వారు పోలీసుల దృష్టికి తీసుకెళ్లినట్లు తెలుస్తోంది.

ఈ కేసును పోలీసులు అన్ని కోణాల్లోనూ విచారిస్తున్నారు. బాలిక ఆలయానికి ఎలా వచ్చింది? నిందితుడితో ఆమెకు ముందే పరిచయం ఉందా? ఈ ఘటనలో ఇంకెవరైనా ప్రమేయం ఉన్నారా? అనే అంశాలపై లోతుగా దర్యాప్తు చేస్తున్నారు. బాధితురాలికి వైద్య పరీక్షలు నిర్వహించి, వాంగ్మూలం నమోదు చేసే ప్రక్రియను చేపట్టారు. పోలీసుల దర్యాప్తు పూర్తయితేనే ఈ ఘటనకు సంబంధించిన పూర్తి వివరాలు తెలిసే అవకాశం ఉంది.