మేమంటే ఆ మాత్రం భ‌యం ఉండాలి మ‌రి.. ట్రంప్‌ను ఓ ఆటాడుకుంటున్న ఇరాన్‌!

అమెరికా అధ్యక్షుడు డొనాల్డ్ ట్రంప్.. ఇరాన్ శక్తిని చూసి ఎంతగా భయపడుతున్నారో తెలియజేసే ఓ ఆసక్తికర ఘటన వెలుగులోకి వచ్చింది. తుర్కియే పర్యటన సందర్భంగా ప్రాణభయంతో ఆయన రహస్యంగా విమానం మారాల్సి వచ్చింది. ఈ ఘటనను ఇరాన్ మీడియా తనకు అనుకూలంగా మలుచుకుని, ఇది ట్రంప్‌కు జరిగిన 'అవమానం' అంటూ తీవ్రంగా ఎద్దేవా చేస్తోంది. అమెరికా, ఇరాన్ మధ్య యుద్ధ వాతావరణం కొనసాగుతున్న వేళ ఈ పరిణామం ప్రాధాన్యత సంతరించుకుంది.

అస‌లేం ఏం జరిగింది?
గత నెల 8న టర్కీ రాజధాని అంకారాలో జరిగిన నాటో సదస్సుకు హాజరైన ట్రంప్, తిరుగు ప్రయాణంలో ఈ రహస్య ఆపరేషన్ చేపట్టారు. ఆయన ప్రయాణిస్తున్న అధ్యక్షుడి అధికారిక విమానం 'ఎయిర్ ఫోర్స్ వన్' లక్ష్యంగా షోల్డర్-ఫైర్డ్ క్షిపణితో దాడి జరిగే అవకాశం ఉందని అమెరికా సీక్రెట్ సర్వీస్‌కు కచ్చితమైన సమాచారం అందింది. దీనికి తోడు ట్రంప్ అంకారాలో బస చేసిన హోటల్‌లోని ఏ అంతస్తులో ఉన్నారనే కచ్చితమైన సమాచారం కూడా ఇరాన్‌కు చేరినట్లు అమెరికా అధికారులు గుర్తించి దిగ్భ్రాంతికి గురయ్యారు. ఈ హెచ్చరికను అత్యంత తీవ్రంగా పరిగణించిన సీక్రెట్ సర్వీస్, వెంటనే ఓ అసాధారణ ఆపరేషన్ చేపట్టింది.

ట్రంప్‌ను, ఆయన కొద్దిమంది సహాయకులను ఓ క్యాటరింగ్ ఫుడ్ ట్రక్కులో ఎక్కించి, ఎయిర్ ఫోర్స్ వన్ నుంచి దూరంగా తీసుకెళ్లారు. అనంతరం ఎలాంటి ప్రత్యేక గుర్తింపు లేని చిన్నపాటి C-32A ప్రభుత్వ జెట్‌లోకి మార్చి తుర్కియే నుంచి తరలించారు. మరోవైపు, వైట్ హౌస్ అధికారులు, మీడియా ప్రతినిధులతో కూడిన అసలైన ఎయిర్ ఫోర్స్ వన్ విమానం యథావిధిగా బయలుదేరింది. ఈ ఆపరేషన్ వివరాలను 'వాషింగ్టన్ పోస్ట్' పత్రిక మొదట వెలుగులోకి తెచ్చింది.

ఎద్దేవా చేస్తున్న ఇరాన్
ఈ ఘటనపై ఇరాన్ అధికారికంగా స్పందించనప్పటికీ, ఆ దేశ ప్రభుత్వ మీడియా మాత్రం ట్రంప్‌ను లక్ష్యంగా చేసుకుని కథనాలు ప్రసారం చేస్తోంది. "ఇరాన్ సైనిక శక్తిని చూసి ట్రంప్ ఎంతగా భయపడ్డారంటే, విమానం కూడా మార్చుకోవాల్సి వచ్చింది. ఇది ఆయనకు జరిగిన అవమానం" అని ఇరాన్ ప్రభుత్వ టీవీ వ్యాఖ్యాత పేర్కొన్నారు. టెహ్రాన్‌లోని పలు ప్రాంతాల్లో ట్రంప్‌ను శవపేటికలో ఉన్నట్లు, సముద్రంలో మునిగిపోతున్నట్లు చూపిస్తూ భారీ హోర్డింగ్‌లు, పోస్టర్లు వెలిశాయి.

ఇక, దక్షిణాఫ్రికాలోని ఇరాన్ రాయబార కార్యాలయం మరో అడుగు ముందుకేసి.. "త్వరలోనే ట్రంప్‌ను ఓ చెత్తబుట్టలో దాచిపెడతాం" అంటూ, ఆయన క్యాటరింగ్ బాక్సులో ఉన్నట్లుగా ఉన్న ఓ మీమ్‌ను 'ఎక్స్' (ట్విట్టర్) లో పోస్ట్ చేసింది.

పెరుగుతున్న ఉద్రిక్తతలు
అమెరికా, ఇరాన్ మధ్య కొనసాగుతున్న యుద్ధంలో భాగంగా తమ గత సుప్రీం లీడర్‌ను అమెరికా హతమార్చిందని, దీనికి ప్రతీకారం తీర్చుకుంటామని ఇరాన్ కొత్త సుప్రీం లీడర్ మొజ్తాబా ఖమేనీ ఇప్పటికే శపథం చేశారు. ఇరు దేశాల మధ్య శాంతి చర్చలు కూడా నిలిచిపోయాయి. గతంలో 2018లో ఇరాక్ పర్యటనకు వెళ్లినప్పుడు కూడా తాను ప్రయాణించిన విమానం కిటికీలన్నీ మూసివేసి, లైట్లు లేకుండా పూర్తి చీకటిలో ప్రయాణించాల్సి వచ్చిందని ట్రంప్ స్వయంగా వెల్లడించారు. తాజా ఘటన ఇరు దేశాల మధ్య ఉన్న తీవ్ర శత్రుత్వానికి, అపనమ్మకానికి అద్దం పడుతోంది.