ఎయిర్‌పోర్టులకు ముందుగానే రండి.. ప్రయాణికులకు ఎయిరిండియా కీలక సూచన

దేశవ్యాప్తంగా విమాన ప్రయాణాలు చేసే వారికి ప్రముఖ విమానయాన సంస్థ ఎయిరిండియా కీలక సూచనలు జారీ చేసింది. ఆగస్టు 10 నుంచి 20వ తేదీ మధ్య ప్రయాణించే వారు, సాధారణం కంటే చాలా ముందుగానే విమానాశ్రయాలకు చేరుకోవాలని సోమవారం విజ్ఞప్తి చేసింది. దేశంలోని పలు విమానాశ్రయాల్లో భద్రతా ఏర్పాట్లను కట్టుదిట్టం చేయడమే ఇందుకు కారణమని స్పష్టం చేసింది.

ఈ మేరకు సోషల్ మీడియా ప్లాట్‌ఫామ్ 'ఎక్స్‌'లో ఎయిరిండియా ఒక ప్రకటన విడుదల చేసింది. "ఆగస్టు 10 నుంచి 20 మధ్య విమానాశ్రయాల్లో అదనపు భద్రతా చర్యలు అమలులో ఉంటాయి. అందువల్ల, ప్రయాణికులు తమ ప్రయాణానికి చాలా ముందుగానే విమానాశ్రయాలకు చేరుకోవాలని సూచిస్తున్నాము," అని ఆ ప్రకటనలో పేర్కొంది. చెక్-ఇన్, బ్యాగేజీ స్క్రీనింగ్, భద్రతా తనిఖీల కోసం అదనపు సమయం కేటాయించుకోవడం ద్వారా ప్రయాణాన్ని సులభతరం చేసుకోవాలని కోరింది.

పెరిగిన భద్రతా ఏర్పాట్ల కారణంగా విమానాశ్రయాల్లోని వివిధ దశల్లో ప్రక్రియ పూర్తికావడానికి ఎక్కువ సమయం పట్టే అవకాశం ఉందని ఎయిరిండియా వివరించింది. చివరి నిమిషంలో ఇబ్బందులను నివారించేందుకే ఈ సూచనలు ఇస్తున్నట్లు తెలిపింది.

ఇప్పటికే చెన్నై అంతర్జాతీయ విమానాశ్రయం కూడా ఆగస్టు 10 నుంచి 20 వరకు హై సెక్యూరిటీ అలర్ట్ ప్రకటించింది. ప్రయాణికులు నిర్ణీత సమయం కంటే ముందుగా రావాలని అక్కడి అధికారులు కూడా సూచించారు. ప్రయాణికుల భద్రతను పెంచడంతో పాటు, విమాన రాకపోకలకు అంతరాయం కలగకుండా ఈ చర్యలు తీసుకుంటున్నట్లు వారు తెలిపారు. ఈ నేపథ్యంలో, ప్రయాణికులు సహకరించి, ప్రయాణానికి ముందే అన్ని ఫార్మాలిటీలు పూర్తి చేసుకుంటే ప్రయాణం సాఫీగా సాగుతుందని అధికారులు చెబుతున్నారు.