ఏటా రూ.1,000 పెంచితే చాలు.. 25 ఏళ్లలో అదనంగా రూ.1.19 కోట్ల సంపద

నెలవారీ సిప్‌లో చిన్న మొత్తాన్ని క్రమంగా పెంచుకుంటూ వెళితే దీర్ఘకాలంలో భారీ సంపదను కూడబెట్టుకోవచ్చని ఓ విశ్లేషణ వెల్లడించింది. నెలవారీగా చేసే సిప్‌ను ఏటా రూ.1,000 చొప్పున పెంచితే.. 25 ఏళ్లలో స్థిరమైన సిప్‌తో పోలిస్తే అదనంగా రూ.1.19 కోట్ల సంపద సమకూరే అవకాశం ఉందని వైట్‌ఓక్‌ క్యాపిటల్‌ విశ్లేషణలో తేలింది.

ఈ లెక్కల ప్రకారం.. నెలకు రూ.10,000 సిప్‌తో పెట్టుబడిని ప్రారంభించి, ప్రతి ఏడాది మరో రూ.1,000 చొప్పున పెంచుకుంటూ వెళ్లాలి. అంటే మొదటి ఏడాది నెలకు రూ.10,000, రెండో ఏడాది రూ.11,000, మూడో ఏడాది రూ.12,000 చొప్పున పెట్టుబడి పెట్టాలి. ఇలా 25వ ఏడాదికి నెలవారీ సిప్‌ రూ.34,000కు చేరుతుంది.

ఇదే సమయంలో సిప్‌ మొత్తాన్ని ఎలాంటి పెంపు లేకుండా నెలకు రూ.10,000 చొప్పున 25 ఏళ్ల పాటు కొనసాగిస్తే మొత్తం పెట్టుబడి రూ.30 లక్షలు అవుతుంది. 13.81 శాతం ‘ఎక్స్‌టెండెడ్ ఇంటర్నల్ రేట్ ఆఫ్ రిటర్న్’ (ఎక్స్‌ఐఆర్‌ఆర్‌) అంచనాతో చివరికి సుమారు రూ.2.30 కోట్ల కార్పస్ ఏర్పడుతుంది.

అయితే ఏటా రూ.1,000 చొప్పున సిప్‌ పెంచే విధానంలో 25 ఏళ్లలో మొత్తం రూ.66 లక్షలు పెట్టుబడి అవుతుంది. 13.34 శాతం ఎక్స్‌ఐఆర్‌ఆర్‌ అంచనాతో తుది కార్పస్ రూ.3.49 కోట్లకు చేరుతుంది. అంటే స్థిరమైన సిప్‌తో పోలిస్తే రూ.1.19 కోట్ల అదనపు సంపద ఏర్పడుతుంది.

రూ.36 లక్షలతో.. రూ.1.18 కోట్ల సంపద
ఈ లెక్కల్లో ఆసక్తికరమైన విషయం ఏమిటంటే.. సిప్‌ను పెంచడం వల్ల 25 ఏళ్లలో అదనంగా పెట్టిన మొత్తం రూ.36 లక్షలు మాత్రమే. కానీ తుది కార్పస్ మాత్రం రూ.1.19 కోట్లు ఎక్కువగా ఉంటుంది. ఇందులో సుమారు రూ.82.48 లక్షలు పెట్టుబడిపై వచ్చిన లాభాలే.

కాంపౌండింగ్ ప్రభావం వల్ల ఈ వ్యత్యాసం కాలం గడిచే కొద్దీ భారీగా పెరుగుతుంది. ఐదేళ్ల తర్వాత రెండు విధానాల మధ్య తేడా రూ.1.25 లక్షలు మాత్రమే. 10 ఏళ్లకు ఇది రూ.7.38 లక్షలకు, 15 ఏళ్లకు రూ.22.59 లక్షలకు, 20 ఏళ్లకు రూ.53.47 లక్షలకు చేరుతుంది. 25 ఏళ్లకు వచ్చేసరికి ఏకంగా రూ.1.19 కోట్లకు పెరుగుతుంది.

టాప్‌అప్‌ సిప్‌ రాబడి శాతం తక్కువగా ఎందుకు?
ఏటా సిప్‌ పెంచే విధానంలో ఎక్స్‌ఐఆర్‌ఆర్‌ 13.34 శాతంగా ఉండగా.. స్థిరమైన సిప్‌లో ఇది 13.81 శాతంగా ఉంది. దీంతో టాప్‌అప్‌ సిప్‌లో రాబడి తక్కువగా ఉందని భావించాల్సిన అవసరం లేదు.

సిప్‌ మొత్తాన్ని ప్రతి ఏడాది పెంచినప్పుడు ఎక్కువ మొత్తంలో పెట్టుబడి చివరి సంవత్సరాల్లో వస్తుంది. ఆ డబ్బుకు కాంపౌండింగ్‌ కోసం తక్కువ సమయం ఉంటుంది. అందుకే ఎక్స్‌ఐఆర్‌ఆర్‌  కొద్దిగా తగ్గుతుంది. అయినప్పటికీ మొత్తం పెట్టుబడి ఎక్కువగా ఉండటంతో చివరికి ఏర్పడే సంపద మాత్రం గణనీయంగా పెరుగుతుంది.

జీతం పెరిగే కొద్దీ ఖర్చులను పెంచుకునే చాలామంది.. పెట్టుబడిని మాత్రం మొదట్లో నిర్ణయించిన మొత్తానికే పరిమితం చేస్తుంటారు. ఇలాంటి వారికి టాప్‌అప్‌ సిప్‌ ఉపయోగపడుతుందని నిపుణుల విశ్లేషణ సూచిస్తోంది. ఏటా కేవలం రూ.1,000 చొప్పున పెట్టుబడిని పెంచినా.. దీర్ఘకాలంలో కాంపౌండింగ్‌ కారణంగా తుది సంపదలో భారీ వ్యత్యాసం కనిపించొచ్చు.

గమనిక: ఇవి ఒక నిర్దిష్ట రాబడి అంచనాతో రూపొందించిన ఉదాహరణ లెక్కలు మాత్రమే. మార్కెట్‌ ఆధారిత పెట్టుబడుల్లో వాస్తవ రాబడులు మారవచ్చు. పెట్టుబడి నిర్ణయం తీసుకునే ముందు ఆర్థిక నిపుణుల సలహా తీసుకోవడం మంచిది.