నీట్ వివాదం తర్వాత దూకుడు పెంచిన సీజేపీ.. దేశవ్యాప్త పర్యటనకు ప్లాన్

నీట్ పేపర్ లీక్ వ్యవహారంపై చేపట్టిన ఆందోళనలతో వచ్చిన ఊపును కొనసాగించేందుకు కాక్రోచ్ జనతా పార్టీ (సీజేపీ) సిద్ధమైంది. ఇందులో భాగంగా దేశవ్యాప్తంగా యువతతో మమేకం కావడానికి 'లిజనింగ్ టూర్' చేపట్టనున్నట్లు సోమవారం ప్రకటించింది. ఈ పర్యటన ద్వారా యువత ఆశలు, ఆందోళనలను నేరుగా తెలుసుకోవాలని లక్ష్యంగా పెట్టుకుంది.

భవిష్యత్ కార్యాచరణను ఖరారు చేసేందుకు మహారాష్ట్రలోని ఛత్రపతి శంభాజీనగర్‌లో బుధ, గురువారాల్లో రెండు రోజుల పాటు కీలక సమావేశం నిర్వహించనున్నట్లు ఎక్స్ వేదికగా సీజేపీ తెలిపింది. ఈ సమావేశానికి పార్టీ వ్యవస్థాపకుడు అభిజీత్ దీప్కే, అధికార ప్రతినిధులు, సంస్థాగత నాయకులు హాజరుకానున్నారు. జంతర్ మంతర్ వద్ద జరిగిన ఆందోళనలో కీలక పాత్ర పోషించిన సుమారు 50 మంది వాలంటీర్లు సహా పలువురు భాగస్వాములతో చర్చించిన తర్వాతే ఈ నిర్ణయం తీసుకున్నట్లు పార్టీ వెల్లడించింది.

తమ ప్రచారం విజయవంతం కావడంతోనే కేంద్ర విద్యాశాఖ మంత్రి పదవికి ధర్మేంద్ర ప్రధాన్ రాజీనామా చేశారని, రెండు నెలల ఆందోళన ముగిసిందని పార్టీ పేర్కొంది. ఈ విజయంతో యువతలో ఆశ, ఆశావాహ దృక్పథం పెరిగాయని అభిప్రాయపడింది.

"యువత చేతిలో ఈ అహంకార ప్రభుత్వానికి ఓటమి ఎదురైంది. యువత ఏకమైతే ఏదైనా సాధించగలరని ఇది నిరూపించింది" అని సీజేపీ ప్రధాన అధికార ప్రతినిధి సౌరవ్ దాస్ అన్నారు. "యువత అంచనాలను అర్థవంతమైన కార్యాచరణగా మార్చేందుకు మా బృందం కృషి చేస్తోంది" అని ఆయన తెలిపారు.

దేశవ్యాప్త పర్యటనకు సంబంధించిన షెడ్యూల్, ఫార్మాట్ వంటి పూర్తి వివరాలను త్వరలో వెల్లడిస్తామని పార్టీ తెలిపింది. నీట్ వ్యతిరేక ఉద్యమం ద్వారా వచ్చిన ఊపును నిలబెట్టుకుంటూ తమ సంస్థాగత, రాజకీయ వ్యూహాలను రూపొందించుకోవడంలో ఈ పర్యటన కీలకం కానుందని భావిస్తున్నారు.