కొత్త స్పిన్ సంచలనం.. కుంబ్లే, వార్న్‌లను దాటేసిన కివీస్ స్పిన్న‌ర్ లెనాక్స్

న్యూజిలాండ్ లెఫ్ట్ ఆర్మ్ స్పిన్నర్ జేడెన్ లెనాక్స్ తన కెరీర్‌లో చిరస్మరణీయ ప్రదర్శనతో అదరగొట్టాడు. వెస్టిండీస్‌తో జరిగిన ఐదు వన్డేల సిరీస్‌లో ఏకంగా 14 వికెట్లు పడగొట్టి, కివీస్ జట్టు 3-2 తేడాతో సిరీస్ కైవసం చేసుకోవడంలో కీలక పాత్ర పోషించాడు. ఈ అద్భుత ప్రదర్శనకు గాను లెనాక్స్ 'ప్లేయర్ ఆఫ్ ది సిరీస్' అవార్డును గెల్చుకున్నాడు. కేవలం తన మూడో ద్వైపాక్షిక సిరీస్‌లోనే అతను ఈ ఘనత సాధించడం విశేషం.

ఈ ప్రదర్శనతో ఒక ద్వైపాక్షిక వన్డే సిరీస్‌లో అత్యధిక వికెట్లు తీసిన స్పిన్నర్ల జాబితాలో శ్రీలంక స్పిన్నర్ అఖిల ధనంజయ సరసన పదో స్థానంలో నిలిచాడు. అంతేకాకుండా స్పిన్ దిగ్గజాలైన షేన్ వార్న్, అనిల్ కుంబ్లే, షాహిద్ అఫ్రిది లాంటి వారు ఒక సిరీస్‌లో సాధించిన అత్యుత్తమ ప్రదర్శన (13 వికెట్లు)ను లెనాక్స్ అధిగమించాడు. ఈ జాబితాలో భారత స్పిన్నర్ అమిత్ మిశ్రా (18 వికెట్లు) అగ్రస్థానంలో ఉండగా, కుల్దీప్ యాదవ్ (17), రషీద్ ఖాన్, యజ్వేంద్ర చాహల్ (16) తర్వాతి స్థానాల్లో ఉన్నారు.

ఈ విజయంపై లెనాక్స్ స్పందిస్తూ.. "కరేబియన్‌లోని స్పిన్‌కు అనుకూలించే పిచ్‌లపై ఆడటం గొప్ప అనుభవాన్నిచ్చింది. ఈ పర్యటన ద్వారా ఎన్నో విషయాలు నేర్చుకున్నాను. సీనియర్ స్పిన్నర్ మిచ్ సాంట్నర్ నుంచి బౌలింగ్‌లోని మెళకువలను నేర్చుకున్నాను. ఆయన అనుభవం నాకు ఎంతగానో ఉపయోగపడింది" అని వివరించాడు.

సిరీస్‌ను న్యూజిలాండ్ గెలుచుకున్నప్పటికీ, మంగళవారం బార్బడోస్‌లో జరిగిన ఐదో, చివరి వన్డేలో వెస్టిండీస్ 2 వికెట్ల తేడాతో విజయం సాధించి ఊరట పొందింది. న్యూజిలాండ్ నిర్దేశించిన 269 పరుగుల లక్ష్యాన్ని విండీస్ 15 బంతులు మిగిలి ఉండగానే ఛేదించింది. షిమ్రాన్ హెట్‌మైర్ (69 నాటౌట్), షెర్ఫేన్ రూథర్‌ఫోర్డ్ (61) కీలక ఇన్నింగ్స్‌లతో జట్టును గెలిపించారు. ఆఖర్లో వికెట్లు కోల్పోయినా హెట్‌మైర్ క్రీజులో నిలబడి జట్టును గెలుపు తీరాలకు చేర్చాడు.