తృణమూల్‌ అగ్రనేత అభిషేక్‌ బెనర్జీ ఆఫీసు కూల్చివేత.. భారీగా మోహరించిన పోలీసులు

తృణమూల్ కాంగ్రెస్ (టీఎంసీ) జాతీయ ప్రధాన కార్యదర్శి, డైమండ్ హార్బర్ ఎంపీ అభిషేక్ బెనర్జీకి చెందిన ఎంపీ కార్యాలయాన్ని అధికారులు శనివారం కూల్చివేయడంతో పశ్చిమ బెంగాల్ రాజకీయాల్లో కొత్త వివాదం చెలరేగింది. దక్షిణ 24 పరగణాల జిల్లాలోని అమ్‌తాలా-బరుయిపూర్ రోడ్డుపై ఉన్న ఈ కార్యాలయం అక్రమంగా నిర్మించారని ఆరోపిస్తూ అధికారులు బుల్డోజర్లతో కూల్చివేత చేపట్టారు.

ఇప్పటికే అనుమతులు లేకుండా నిర్మాణం చేపట్టారని పేర్కొంటూ అధికారులు నోటీసులు జారీ చేశారు. శాంతిభద్రతల దృష్ట్యా భారీగా పోలీసులు, అధికారులు అక్కడ మోహరించారు. కూల్చివేత ప్రారంభమైన వెంటనే టీఎంసీ కార్యకర్తలు, స్థానికులు పెద్ద సంఖ్యలో అక్కడికి చేరుకున్నారు.

ఈ పరిణామానికి ముందు అభిషేక్ బెనర్జీ, ఆయన కుటుంబ సభ్యులు, వారి సంస్థ ‘లీప్స్ అండ్ బౌండ్స్’ పేర్లపై నమోదైనట్లు పేర్కొన్న 17 ఆస్తులకు కోల్‌కతా మున్సిపల్ కార్పొరేషన్ (కేఎంసీ) కూల్చివేత నోటీసులు జారీ చేసింది. వాటిలో హరీశ్ ముఖర్జీ రోడ్డులోని అభిషేక్ నివాసం ‘శాంతినికేతన్’ కూడా ఉంది.

ఇటీవల అభిషేక్ బెనర్జీకి సంబంధం ఉన్నాయని ఆరోపిస్తూ 43 ఆస్తుల జాబితాను బీజేపీ విడుదల చేసింది. అయితే ఆ ఆరోపణలను టీఎంసీ రాజ్యసభ సభ్యుడు సాకేత్ గోఖలే ఖండించారు. మున్సిపల్ రికార్డుల్లో ‘అభిషేక్ బెనర్జీ’ పేరుతో పలువురు ఉన్నారని, ఆ జాబితాలోని అన్ని ఆస్తులు టీఎంసీ నేతవేనని చెప్పలేమని స్పష్టం చేశారు.

ఇప్పటివరకు ఎంపీ కార్యాలయం కూల్చివేతపై అభిషేక్ బెనర్జీ గానీ, టీఎంసీ గానీ అధికారికంగా స్పందించలేదు. కాగా ఇటీవల టీఎంసీకి చెందిన మరో నేత సౌకత్ మొల్లా కుమారుడికి సంబంధం ఉందని ఆరోపించిన ఆక్రమణ కేఫేను కూడా అధికారులు కూల్చివేశారు. దీంతో టీఎంసీ నేతల ఆస్తులపై వరుస చర్యలు రాజకీయంగా చర్చనీయాంశంగా మారాయి.