భారత స్మార్ట్‌ఫోన్ మార్కెట్‌కు గట్టి షాక్.. ఆరేళ్ల కనిష్ఠానికి అమ్మకాలు.. 'నథింగ్' మాత్రం దూసుకెళ్లింది!

భారత స్మార్ట్‌ఫోన్ మార్కెట్‌కు గట్టి ఎదురుదెబ్బ తగిలింది. 2026 రెండో త్రైమాసికంలో (ఏప్రిల్-జూన్) స్మార్ట్‌ఫోన్ల విక్రయాలు గత ఏడాదితో పోలిస్తే 10 శాతం క్షీణించాయి. గత ఆరేళ్లలో ఒక జూన్ త్రైమాసికంలో ఈ స్థాయిలో అమ్మకాలు పడిపోవడం ఇదే తొలిసారి. స్మార్ట్‌ఫోన్లలో వాడే మెమరీ, ఇతర విడిభాగాల ధరలు విపరీతంగా పెరగడమే ఈ పతనానికి ప్రధాన కారణంగా విశ్లేషకులు చెబుతున్నారు. దీంతో ఫోన్ల ధరలు పెరిగి, వినియోగదారులు కొత్త ఫోన్లు కొనడాన్ని వాయిదా వేసుకుంటున్నారు.

ప్రముఖ రీసెర్చ్ సంస్థ కౌంటర్‌పాయింట్ నివేదిక ప్రకారం.. 2025 సెప్టెంబర్ నుంచి DRAM, NAND వంటి మెమరీ చిప్‌ల ధరలు దాదాపు నాలుగింతలు పెరిగాయి. ఈ ధరలు భవిష్యత్తులో మరింత పెరిగే అవకాశం ఉందని అంచనా. ఈ ప్రభావంతో దాదాపు అన్ని కంపెనీలు తమ ఫోన్ల ధరలను పెంచేశాయి. ముఖ్యంగా బడ్జెట్, మధ్యశ్రేణి సెగ్మెంట్లలో అమ్మకాలు గణనీయంగా తగ్గాయి. రూ.15,000 లోపు సెగ్మెంట్‌లో అమ్మకాలు ఏకంగా 45 శాతం పడిపోవడం పరిస్థితి తీవ్రతకు అద్దం పడుతోంది.

వివో టాప్.. శాంసంగ్ మాత్రమే గ్రోత్
ఈ త్రైమాసికంలో 18 శాతం మార్కెట్ వాటాతో వివో అగ్రస్థానంలో నిలిచింది. అయితే, ధరల పెరుగుదల కారణంగా ఆ సంస్థకు చెందిన బడ్జెట్ Y, T సిరీస్ ఫోన్ల అమ్మకాలు ఒత్తిడిని ఎదుర్కొన్నాయి. 14 శాతం వాటాతో ఒప్పో మూడో స్థానంలో ఉండగా, షావోమీ (పోకోతో కలిపి) 13 శాతంతో నాలుగో స్థానంలో, రియల్‌మీ ఐదో స్థానంలో నిలిచాయి. టాప్-5 బ్రాండ్లలో వృద్ధిని నమోదు చేసిన ఏకైక సంస్థగా శాంసంగ్ నిలిచింది. గెలాక్సీ A, S సిరీస్ మోడళ్లకు ఉన్న డిమాండ్, ప్రత్యేక ఆఫర్లతో శాంసంగ్ 2 శాతం వృద్ధి సాధించి రెండో స్థానాన్ని దక్కించుకుంది. 

అందరినీ ఆశ్చర్యపరిచిన 'నథింగ్'
మార్కెట్ మొత్తం ప్రతికూల పరిస్థితుల్లో ఉన్నప్పటికీ, లండన్‌కు చెందిన 'నథింగ్' బ్రాండ్ మాత్రం అద్భుతమైన పనితీరు కనబరిచింది. గతేడాదితో పోలిస్తే ఏకంగా 105 శాతం వృద్ధిని నమోదు చేసింది. గత పది త్రైమాసికాల్లో తొమ్మిది సార్లు భారతదేశంలో అత్యంత వేగంగా అభివృద్ధి చెందుతున్న బ్రాండ్‌గా నిలవడం విశేషం. ఆ సంస్థకు చెందిన ఫోన్ (4a) సిరీస్‌కు బలమైన డిమాండ్, కొత్తగా విడుదలైన ఫోన్ (4b) విజయం ఈ వృద్ధికి కారణమయ్యాయి. ఫోన్ (4b) ఫ్లిప్‌కార్ట్‌లో రూ.30,000 పైబడిన సెగ్మెంట్‌లో విడుదలైన మొదటి వారంలోనే టాప్ సెల్లర్‌గా నిలిచింది. తమ బ్రాండ్ ప్రత్యేకమైన డిజైన్, ఆవిష్కరణలు, ఐపీఎల్‌లో రాయల్ ఛాలెంజర్స్ బెంగళూరుకు టైటిల్ స్పాన్సర్‌గా నిలవడం వంటి ప్రచార కార్యక్రమాలు ఈ విజయానికి దోహదపడ్డాయని నథింగ్ సహ-వ్యవస్థాపకుడు అకిస్ ఇవాంజెలిడిస్ తెలిపారు.

ప్రస్తుత పరిస్థితులను బట్టి చూస్తే, 2026 మొత్తం మీద స్మార్ట్‌ఫోన్ మార్కెట్ 13 శాతం క్షీణించే అవకాశం ఉందని కౌంటర్‌పాయింట్ రీసెర్చ్ డైరెక్టర్ తరుణ్ పాఠక్ అంచనా వేశారు. ప్రపంచవ్యాప్తంగా ఏఐకి పెరుగుతున్న డిమాండ్ కారణంగా మెమరీ కొరత ఏర్పడటం కూడా ఈ పరిస్థితికి ఒక కారణమని నిపుణులు విశ్లేషిస్తున్నారు.