పవన్ కల్యాణ్‌ను పరామర్శించిన రఘురామ

ఆంధ్రప్రదేశ్ ఉప ముఖ్యమంత్రి, జనసేన అధినేత పవన్ కల్యాణ్ భుజానికి శస్త్రచికిత్స అనంతరం ప్రస్తుతం హైదరాబాదులో విశ్రాంతి తీసుకుంటున్నారు. శుక్రవారం సాయంత్రం పలువురు పార్టీ నేతలు, ప్రముఖులు ఆయనను పరామర్శించి, ఆరోగ్య పరిస్థితి గురించి అడిగి తెలుసుకున్నారు.

పవన్‌ కల్యాణ్‌ను పరామర్శించిన వారిలో ఆంధ్రప్రదేశ్ శాసనసభ డిప్యూటీ స్పీకర్ రఘురామకృష్ణరాజు, మాజీ మంత్రి బాలినేని శ్రీనివాసరెడ్డి, జనసేన పార్టీ విప్ బొమ్మిడి నాయకర్, ఎమ్మెల్యేలు నిమ్మక జయకృష్ణ, గిడ్డి సత్యనారాయణ, అరవ శ్రీధర్ సహా పలువురు సినీ నిర్మాతలు, న్యాయవాదులు ఉన్నారు. ఆయన వేగంగా కోలుకుంటుండటం పట్ల వారు హర్షం వ్యక్తం చేస్తూ, త్వరలోనే సంపూర్ణ ఆరోగ్యంతో తిరిగి ప్రజాసేవలోకి రావాలని ఆకాంక్షించారు.

పవన్ కల్యాణ్ కుడి భుజానికి తీవ్ర గాయం కావడంతో జూలై 11న ముంబైలోని కోకిలాబెన్ ధీరూభాయ్ అంబానీ ఆసుపత్రిలో శస్త్రచికిత్స జరిగిన విషయం విదితమే. ప్రముఖ వైద్య నిపుణులు డాక్టర్ దిన్షా పర్దివాలా నేతృత్వంలో సుమారు మూడున్నర గంటల పాటు 'ఆర్త్రోస్కోపిక్ రిపేర్ సర్జరీ' విజయవంతంగా పూర్తయింది. శస్త్రచికిత్స అనంతరం ఆయన ఆరోగ్యం నిలకడగా ఉందని, వేగంగా కోలుకుంటున్నారని జనసేన పార్టీ వర్గాలు వెల్లడించాయి.

పవన్ కల్యాణ్ సంపూర్ణంగా కోలుకుని, భుజం పనితీరు సాధారణ స్థితికి రావడానికి సుమారు నాలుగు నెలల సమయం పడుతుందని వైద్యులు తెలిపారు. ప్రస్తుతం తీసుకుంటున్న విశ్రాంతి, నొప్పి తీవ్రతను పరిగణనలోకి తీసుకుని, మరో రెండు నెలల తర్వాత ఆయన ఎడమ భుజానికి కూడా శస్త్రచికిత్స నిర్వహించనున్నారు. 2016 నుంచి బాధిస్తున్న పాత గాయం, సినిమా షూటింగులు మరియు రాజకీయ ప్రచారాల కారణంగా మరింత తీవ్రం కావడంతో వైద్యులు శస్త్రచికిత్సను అనివార్యమని సూచించారు.