15 ఏళ్ల బంధం.. యజమానితో పాటే అనంత లోకాలకు.. అంతిమయాత్రలో ప్రాణాలు వదిలిన శునకం!

 యజమానిపై పెంపుడు జంతువులకు ఉండే ప్రేమ, విశ్వాసాలకు నిలువుటద్దం పట్టే హృదయవిదారక ఘటన మధ్యప్రదేశ్‌లో చోటుచేసుకుంది. 15 ఏళ్లుగా అల్లారుముద్దుగా పెంచుకున్న యజమాని మరణాన్ని తట్టుకోలేక, ఆయన అంతిమయాత్రలో పాల్గొని ఓ శునకం ప్రాణాలు విడిచింది. యజమాని, శునకం మధ్య ఉన్న ఈ అపురూపమైన బంధం గురించి తెలిసి అందరూ చలించిపోతున్నారు.

వివరాల్లోకి వెళితే.. మధ్యప్రదేశ్‌లోని బేతుల్ జిల్లా సివిల్ లైన్స్ ప్రాంతానికి చెందిన ప్రదీప్ జైన్ (67) గత ఎనిమిది రోజులుగా అనారోగ్యంతో బాధపడుతూ భోపాల్‌లోని ఎయిమ్స్‌లో చికిత్స పొందుతూ కన్నుమూశారు. ఆదివారం సాయంత్రం ఆయన మృతదేహాన్ని బేతుల్‌లోని స్వగృహానికి తీసుకొచ్చారు. ప్రదీప్ జైన్ 15 ఏళ్లుగా 'డగ్గూ' అనే పోమరేనియన్ జాతికి చెందిన కుక్కను ఎంతో ప్రేమగా పెంచుకుంటున్నారు. యజమాని మృతదేహాన్ని చూసిన డగ్గూ తీవ్రమైన ఆవేదనకు గురైంది.

ఆదివారం రాత్రంతా డగ్గూ కనీసం నిద్రపోలేదని, యజమాని కోసం గట్టిగా అరుస్తూ, అతడి వద్దకు వెళ్లేందుకు ప్రయత్నించిందని కుటుంబ సభ్యులు తెలిపారు. సోమవారం ఉదయం ప్రదీప్ జైన్ అంతిమయాత్ర ప్రారంభమయ్యే ముందు, డగ్గూను ఆయన మృతదేహం వద్దకు తీసుకెళ్లారు. అది తన యజమాని పక్కన నిశ్శబ్దంగా కొన్ని నిమిషాల పాటు కూర్చుంది. ఆ తర్వాత అంతిమయాత్ర మొదలవగా, డగ్గూ కూడా పాడె వెంట కొంత దూరం నడిచింది. అయితే, కొద్దిసేపటికే అది ఒక్కసారిగా కుప్పకూలిపోయి అక్కడికక్కడే ప్రాణాలు విడిచింది.

ప్రదీప్ జైన్, డగ్గూ మధ్య ఉన్న బంధం గురించి ఆయన తమ్ముడు దిలీప్ జైన్ వివరిస్తూ భావోద్వేగానికి గురయ్యారు. "ప్రతిరోజూ మా అన్నయ్య ఇంటికి తిరిగి రావడం కోసం డగ్గూ ఎంతో ఆత్రుతగా ఎదురుచూసేది. చాలాసార్లు ఇద్దరూ కలిసే భోజనం చేసేవారు. ఎప్పుడైనా అన్నయ్యకు ఆరోగ్యం బాగోలేనప్పుడు, డగ్గూ కూడా తినడం మానేసి అనారోగ్యానికి గురయ్యేది. వారిద్దరి మధ్య అంతటి విడదీయరాని అనుబంధం ఉండేది" అని తెలిపారు.

ప్రదీప్ జైన్ దహన సంస్కారాలు నిర్వహించిన ప్రదేశానికి సమీపంలోనే కుటుంబ సభ్యులు డగ్గూకు అంత్యక్రియలు నిర్వహించారు. బతికున్నప్పుడు కలిసున్నట్టే, మరణంలోనూ వారి బంధం ముడిపడి ఉందని స్థానికులు వ్యాఖ్యానిస్తున్నారు. ఈ ఘటన జంతుప్రేమికులను తీవ్రంగా కలచివేసింది. ఈ ఘటనకు సంబంధించిన ఫొటోలు, వీడియోలు సోషల్ మీడియాలో వైరల్ అయ్యాయి. శునకాలకున్న విశ్వాసాన్ని, ప్రేమను కొనియాడుతూ నెటిజన్లు భావోద్వేగపూరిత కామెంట్లు పెడుతున్నారు.