దక్షిణాది సినిమాల ఎదుగుదలను 15 ఏళ్ల క్రితమే ఊహించా: గోవిందా

బాలీవుడ్ నటుడు గోవిందా తన కొత్త చిత్రం ‘రూపా’తో ప్రేక్షకుల ముందుకు రానున్నారు. ఈ సందర్భంగా నిర్వహించిన మీడియా సమావేశంలో మాట్లాడుతూ.. దక్షిణాది సినిమా ఎదుగుదలను తాను 15 ఏళ్ల క్రితమే ఊహించానని చెప్పారు.

తాను ఓ స్నేహితుడితో పదేళ్లలో దక్షిణాది సినిమాలు దేశవ్యాప్తంగా ప్రభావం చూపుతాయని చెప్పానని గోవిందా తెలిపారు. ఆ తర్వాత ప్రభుదేవా దర్శకత్వంలో వచ్చిన ‘వాంటెడ్’, అక్షయ్ కుమార్ నటించిన ‘రౌడీ రాథోడ్’, అజయ్ దేవగణ్ ‘దృశ్యం’ వంటి దక్షిణాది రీమేక్ చిత్రాలు భారీ విజయాలు సాధించాయని గుర్తు చేశారు. ఈ సినిమాల విజయంతో హీరోలు గొప్ప ఖ్యాతి గడించారని పేర్కొన్నారు.

ప్రస్తుతం సినిమాలు విడుదలయ్యే విధానం పూర్తిగా మారిపోయినా మార్కెట్ గురించి తాను ఎక్కువగా ఆలోచించనని గోవిందా చెప్పారు. నిజాయతీగా పని చేయడమే తన లక్ష్యమని, ప్రేక్షకులు ‘‘ఇది గోవిందానే చేయగలడు’’ అనుకునేలా నటించాలని కోరుకుంటానని అన్నారు.

సినిమాలు ఎంపిక చేసుకునే విషయంలో గతంలో తాను నిర్మాణ విలువలు లేదా దర్శకుడి పేరు కంటే కుటుంబ పరిస్థితులనే ఎక్కువగా చూసేవాడినని వెల్లడించారు. పేద కుటుంబం నుంచి వచ్చిన తాను అప్పట్లో డబ్బు సంపాదించి కుటుంబాన్ని సంతోషంగా ఉంచడమే లక్ష్యంగా పెట్టుకున్నానని చెప్పారు. తన తల్లి కూడా అదే విషయాన్ని గుర్తు చేస్తూ సలహాలు ఇచ్చేదని గోవిందా తెలిపారు.