మంటల్లో పశ్చిమాసియా: ఇరాన్‌పై అమెరికా తాజా వైమానిక దాడులు.. కువైట్, బహ్రెయిన్‌లపై ఇరాన్ క్షిపణుల వర్షం!

పశ్చిమాసియాలో అమెరికా-ఇరాన్ సంక్షోభం బుధవారం మరింత ముదిరి అదుపు తప్పింది. ఇరాన్ లోపల ఉన్న సైనిక లక్ష్యాలపై అమెరికా వైమానిక దళాలు మరో రౌండ్ భారీ దాడులకు దిగాయి. హర్మూజ్ జలసంధిలో వాణిజ్య నౌకలపై దాడులకు ఉపయోగిస్తున్న ఇరాన్ సామర్థ్యాలను దెబ్బతీయడమే లక్ష్యంగా ఈ దాడులు చేసినట్లు యూఎస్ ప్రకటించింది. దీనికి ప్రతీకారంగా ఇరాన్ సైన్యం (ఐఆర్‌జీసీ) బహ్రెయిన్, కువైట్ దేశాల్లోని అమెరికా మిలిటరీ స్థావరాలపై క్షిపణులు, డ్రోన్ల వర్షం కురిపించింది.

కువైట్, బహ్రెయిన్‌లపై ఇరాన్ దాడి.. రంగంలోకి 21 యూఎస్ యుద్ధనౌకలు
కువైట్‌లోని అలీ అల్ సలేం ఎయిర్ బేస్ లక్ష్యంగా ఇరాన్ ప్రయోగించిన ఒక బాలిస్టిక్ క్షిపణి, 5 క్రూయిజ్ క్షిపణులు, 33 డ్రోన్లను తమ ఎయిర్ డిఫెన్స్ సిస్టమ్స్ అడ్డుకున్నట్లు కువైట్ సైన్యం ప్రకటించింది. అయితే ఈ దాడిలో కువైట్ నౌకాదళానికి చెందిన ఒక నౌక ధ్వంసమవగా, నలుగురు సైనికులు గాయపడ్డారు. మరోవైపు బహ్రెయిన్‌లోని యూఎస్ ఐదో నౌకాదళం కమాండ్ సెంటర్లను పూర్తిగా ధ్వంసం చేసినట్లు ఇరాన్ ప్రకటించింది. కాగా, ఇరాన్ ఓడరేవులను నిర్బంధించడానికి అమెరికా ఏకంగా 21 అత్యాధునిక యుద్ధనౌకలను హర్మూజ్ జలసంధి చుట్టూ రంగంలోకి దించింది. ఇరాన్ వైఖరిపై ట్రంప్ స్పందిస్తూ.. "ఇరాన్ చర్చల టేబుల్ వద్దకు రాకపోతే వారి విద్యుత్ ప్లాంట్లు, వంతెనలను పూర్తిగా కూల్చేస్తాం. చమురు, ఇంధన కేంద్రాలపై దాడులను చివరి ఆప్షన్‌గా పెట్టుకున్నాం" అని ఫాక్స్ న్యూస్ ఇంటర్వ్యూలో హెచ్చరించారు.

 ట్రంప్‌పై డెమొక్రాట్ల మండిపాటు.. యూఎన్‌లో ఇరాన్ ఫిర్యాదు
అమెరికా అధ్యక్షుడు డొనాల్డ్ ట్రంప్ తీసుకుంటున్న నిర్ణయాలపై అమెరికా కాంగ్రెస్‌లోనే తీవ్ర వ్యతిరేకత వ్యక్తమవుతోంది. ట్రంప్ ఎలాంటి ముందస్తు ప్రణాళిక, ఎగ్జిట్ స్ట్రాటజీ లేకుండానే దేశాన్ని ఒక ‘అక్రమ యుద్ధం’ లోకి లాగుతున్నారని యూఎస్ సెనెట్ మైనారిటీ లీడర్ చక్ షుమర్ మండిపడ్డారు. ఈ యుద్ధం వల్ల అంతర్జాతీయంగా నిత్యావసరాలు, ఇంధన ధరలు పెరిగి సామాన్యులపై భారం పడుతుందని ఆందోళన వ్యక్తం చేశారు. 

మరోవైపు "అమెరికా బాధితుడు కాదు.. ముఠా నాయకుడిలా దాడి చేస్తున్న దురాక్రమణదారు" అంటూ ఇరాన్ రాయబారి ఆమిర్ సయీద్ ఇరవానీ ఐక్యరాజ్యసమితి (యూఎన్) ప్రధాన కార్యదర్శి ఆంటోనియో గుటెర్రెస్‌కు ఘాటుగా లేఖ రాశారు. ఈ ఘర్షణల నేపథ్యంలో జోర్డాన్, బ్రిటన్ దేశాలు కూడా దౌత్యపరమైన అత్యవసర చర్యలు చేపట్టాయి.