నేడు ప్రపంచ జనాభా దినోత్సవం... భారత్ జనాభా ఎంతో తెలుసా?

ప్రపంచ జనాభా దినోత్సవం సందర్భంగా, అత్యధిక జనాభా కలిగిన దేశంగా భారత్ తన అగ్రస్థానాన్ని మరోసారి సుస్థిరం చేసుకుంది. తాజా అంచనాల ప్రకారం, దేశ జనాభా సుమారు 147.7 కోట్లకు (147,72,59,770) చేరింది. ఇది ప్రపంచ మొత్తం జనాభాలో దాదాపు 17.8 శాతానికి సమానం. "యువత ఆశలు, ఆకాంక్షలను నేడూ, భవిష్యత్తులోనూ సాకారం చేయడం" అనే ఇతివృత్తంతో ఐక్యరాజ్యసమితి ఈ ఏడాది జనాభా దినోత్సవాన్ని నిర్వహిస్తోంది.

ప్రస్తుతం ప్రపంచ జనాభా సుమారు 820 కోట్లుగా ఉండగా, భారత్ అగ్రస్థానంలో కొనసాగుతోంది. కొన్నేళ్ల క్రితమే చైనాను అధిగమించిన భారత్, జనాభా పెరుగుదలలో తన ఆధిపత్యాన్ని నిలబెట్టుకుంది. ప్రస్తుతం చైనా జనాభా 141 కోట్లుగా ఉంది. అయితే, చైనాలో సగటు వయసు 40.6 ఏళ్లుగా ఉండటంతో ఆ దేశం వృద్ధాప్య సమస్యలను ఎదుర్కొంటోంది. దీనికి భిన్నంగా, భారత్‌లో సగటు వయసు కేవలం 29 ఏళ్లు మాత్రమే. దేశ జనాభాలో 65 శాతం మంది 35 ఏళ్లలోపు వారే ఉండటం దేశానికి ఉన్న అతిపెద్ద సానుకూలాంశం.

ఈ భారీ యువ జనాభా ఒకవైపు ఆర్థిక వృద్ధికి, నూతన ఆవిష్కరణలకు చోదక శక్తిగా మారుతున్నప్పటికీ, మరోవైపు వనరులు, ఉద్యోగావకాశాలు, పట్టణ సేవలపై తీవ్ర ఒత్తిడిని పెంచుతోంది. ఈ సవాళ్లను అధిగమించేందుకు విద్య, ఆరోగ్యం, ఉపాధి కల్పన రంగాల్లో భారీగా పెట్టుబడులు పెట్టాల్సిన అవసరం ఉందని నిపుణులు సూచిస్తున్నారు.

ఇదిలా ఉండగా, జనాభాకు సంబంధించిన మరింత కచ్చితమైన, స్పష్టమైన సమాచారం కోసం భారత్ 2027లో తొలిసారిగా పూర్తిస్థాయి డిజిటల్ జనాభా గణనను చేపట్టనుంది. భారత్‌లో జనాభా వృద్ధి రేటు (0.87 శాతం) క్రమంగా తగ్గుముఖం పడుతున్నప్పటికీ, ప్రస్తుత యువశక్తిని సరైన మార్గంలో మళ్లించడం దేశ భవిష్యత్తుకు అత్యంత కీలకం.