కిడ్నీలో రాళ్లు ఉన్నాయా? ఈ ఆహార పదార్థాలతో చాలా జాగ్రత్త!

ఆరోగ్యంగా ఉండాలని మనం తీసుకునే కొన్ని ఆహార పదార్థాలే మన కిడ్నీలకు ముప్పుగా పరిణమించే ప్రమాదం ఉందని ఆరోగ్య నిపుణులు హెచ్చరిస్తున్నారు. ముఖ్యంగా కిడ్నీలో రాళ్ల (కాల్షియం ఆక్సలేట్ స్టోన్స్) సమస్యతో బాధపడేవారు కొన్ని పోషకాహారాల విషయంలో చాలా జాగ్రత్తగా ఉండాలని సూచిస్తున్నారు. వీటిలో ఆక్సలేట్ (Oxalate) అధికంగా ఉండటమే ఇందుకు కారణం.

ఆక్సలేట్ అధికంగా ఉండే ఆహారాలివే..
మనలో చాలామంది ఆరోగ్యకరమని భావించే రాగులు, జీడిపప్పు, దానిమ్మ, డార్క్ చాక్లెట్, టమాటా (ముఖ్యంగా గింజలు), పొద్దుతిరుగుడు విత్తనాలు, వేరుశెనగలు, రాజగిరా (తోటకూర గింజల పిండి) వంటి వాటిలో ఆక్సలేట్ స్థాయిలు ఎక్కువగా ఉంటాయి. ఈ పదార్థాలను తరచుగా, అధిక మోతాదులో తీసుకున్నప్పుడు మూత్రంలో ఆక్సలేట్ స్థాయిలు పెరిగి, అవి కాల్షియంతో కలిసి రాళ్లుగా మారే అవకాశం ఉంటుంది. కాబట్టి, కిడ్నీలో రాళ్ల సమస్య ఉన్నవారు లేదా ఆ ముప్పు పొంచి ఉన్నవారు ఈ పదార్థాలను పూర్తిగా మానేయాల్సిన అవసరం లేదు కానీ, పరిమితంగా తీసుకోవడం చాలా ముఖ్యం.

నివారణకు ఏం చేయాలి?

• కిడ్నీలో రాళ్ల సమస్యను నివారించడానికి జీవనశైలిలో కొన్ని మార్పులు చేసుకోవడం చాలా అవసరం.
• ప్రతిరోజూ తప్పనిసరిగా 2.5 నుంచి 3 లీటర్ల నీరు తాగాలి. ఇది మూత్రంలో ఆక్సలేట్లను పలుచబరచి రాళ్లు ఏర్పడకుండా నిరోధిస్తుంది.
• ఉప్పు, ప్రాసెస్ చేసిన ఆహార పదార్థాలను తగ్గించాలి.
• ఆహారంలో తగినంత కాల్షియం ఉండేలా చూసుకోవాలి.

ఏవైనా సందేహాలుంటే వైద్యుడు లేదా డైటీషియన్ సూచనలు పాటిస్తూ సరైన ఆహార నియమాలను అనుసరించడం ద్వారా కిడ్నీలను ఆరోగ్యంగా కాపాడుకోవచ్చు.