ఇరాన్‌తో కాల్పుల విరమణ ముగిసింది: ట్రంప్ సంచలన ప్రకటన

ఇరాన్‌తో కుదుర్చుకున్న కాల్పుల విరమణ ఒప్పందం అధికారికంగా ముగిసిపోయిందని అమెరికా అధ్యక్షుడు డొనాల్డ్ ట్రంప్ శుక్రవారం కీలక ప్రకటన చేశారు. అయినప్పటికీ, ఇరాన్ అభ్యర్థన మేరకు ఆ దేశంతో దౌత్యపరమైన చర్చలను కొనసాగించేందుకు తాము సిద్ధంగా ఉన్నామని ఆయన స్పష్టం చేశారు.

ఈ మేరకు తన సోషల్ మీడియా వేదిక 'ట్రూత్ సోషల్'లో ట్రంప్ ఒక పోస్ట్ చేశారు. "చర్చలు కొనసాగించాలని ఇస్లామిక్ రిపబ్లిక్ ఆఫ్ ఇరాన్ మమ్మల్ని కోరింది. అందుకు మేము అంగీకరించాం. కానీ, కాల్పుల విరమణ ఒప్పందం మాత్రం ముగిసిపోయిందని వారికి చాలా స్పష్టంగా చెప్పాం" అని ట్రంప్ తన పోస్టులో పేర్కొన్నారు.

ఇరు దేశాల మధ్య నెలల తరబడి సాగిన ఉద్రిక్తతల అనంతరం గత జున్‌లో ఒక తాత్కాలిక ఒప్పందం కుదిరింది. అయితే, ఇటీవల ఇరాన్‌కు చెందిన 170కి పైగా సైనిక స్థావరాలపై అమెరికా దాడులు నిర్వహించింది. ఇందులో డ్రోన్, క్షిపణి నిల్వ కేంద్రాలతో పాటు ఎయిర్ డిఫెన్స్ వ్యవస్థలు ఉన్నాయి. దీనికి ప్రతీకారంగా ఖతార్, బహ్రెయిన్, కువైట్‌లలోని అమెరికా స్థావరాలపై ఇరాన్ దాడులకు దిగింది. ఈ పరిణామాల నేపథ్యంలో కాల్పుల విరమణ ఒప్పందం పూర్తిగా విఫలమైంది.

మరోవైపు, చర్చలను పునరుద్ధరించే లక్ష్యంతో అమెరికాతో సమన్వయం చేసుకుంటూ ఖతార్ మధ్యవర్తులు ఇరాన్‌లో పర్యటిస్తున్నారు. ముఖ్యంగా, ప్రపంచ చమురు రవాణాలో అత్యంత కీలకమైన 'హోర్ముజ్ జలసంధి'కి సంబంధించిన నిబంధనలపై ఇరు దేశాల మధ్య తీవ్ర విభేదాలు నెలకొన్నట్లు సమాచారం. క్షేత్రస్థాయిలో ఉద్రిక్తతలు కొనసాగుతున్నప్పటికీ, ఇరు దేశాలు ఒకవైపు సైనిక చర్యలు, మరోవైపు దౌత్య ప్రయత్నాలను ఏకకాలంలో కొనసాగిస్తుండటంతో పరిస్థితులు అనిశ్చితంగా మారాయి.