కోడలికి కన్యాదానం చేసిన మామ.. మానవత్వానికి నిలువుటద్దంగా నిలిచిన ఘటన

కొడుకు మరణంతో శోకసంద్రంలో మునిగిన ఆ కుటుంబం, తమ కోడలి భవిష్యత్తు గురించి ఆలోచించింది. ఆమెను కూతురిలా భావించి, మరో పెళ్లి చేసి కొత్త జీవితాన్ని అందించింది. అంతటితో ఆగకుండా, కన్నతండ్రి స్థానంలో నిలబడి మామగారే స్వయంగా కన్యాదానం చేసి మానవత్వానికి నిలువుటద్దంగా నిలిచారు. మధ్యప్రదేశ్‌లోని భోపాల్‌లో జరిగిన ఈ హృద్యమైన ఘటన ఇప్పుడు సోషల్ మీడియాలో ప్రశంసలు అందుకుంటోంది.

వివరాల్లోకి వెళితే.. భోపాల్‌కు చెందిన దినేష్ వైరాగి కుమారుడు క్యాన్సర్ కారణంగా మరణించాడు. దీంతో ఆయన కోడలు చిన్న వయసులోనే వితంతువుగా మిగిలిపోయింది. ఈ విషాదం నుంచి తేరుకున్న దినేష్, ఆయన కుటుంబ సభ్యులు.. కోడలిని ఒంటరిగా వదిలివేయలేదు. ఆమెకు అండగా నిలబడి, కొత్త జీవితం ఇవ్వాలని నిర్ణయించుకున్నారు. ఆమెకు తగిన వరుడిని వెతికి, ఇటీవల భోపాల్‌లో ఘనంగా వివాహం జరిపించారు. ఈ వేడుకలో అత్యంత కీలకమైన కన్యాదానం ఘట్టాన్ని మామ దినేష్ వైరాగి స్వయంగా నిర్వహించి అందరినీ కదిలించారు.

ఈ సందర్భంగా దినేష్ వైరాగి ఏఎన్ఐ వార్తా సంస్థతో మాట్లాడుతూ.. "ఆమె మాకు ఎంతో మంచి కోడలు. కొడుకు మరణం తర్వాత ఆమెను మా సొంత కూతురిలా స్వీకరించాం. ఆమె ఓ కొత్త జీవితాన్ని ప్రారంభించాలని మేం కోరుకున్నాం. ఆమె భవిష్యత్తుకు బాటలు వేయడం మా బాధ్యతగా భావించాం. మా ఈ నిర్ణయం వితంతు పునర్వివాహాల విషయంలో సమాజంలోని మరిన్ని కుటుంబాలకు స్ఫూర్తినిస్తుందని ఆశిస్తున్నాను" అని తెలిపారు.

కోడలి తండ్రి రాంబాబు వైరాగి మాట్లాడుతూ.. అల్లుడు చనిపోయిన తర్వాత వియ్యంకుల కుటుంబం నుంచి ఇంతటి మద్దతు లభిస్తుందని తాను ఊహించలేదని ఆనందం వ్యక్తం చేశారు. తన కూతురిని సొంత బిడ్డలా చూసుకుని, పెళ్లి బాధ్యతలు తీసుకుంటామని దాదాపు ఏడాది క్రితమే దినేష్ వైరాగి తనకు మాట ఇచ్చారని, ఆ మాటను నిలబెట్టుకున్నారని కృతజ్ఞతలు తెలిపారు. ఈ వివాహానికి హాజరైన అతిథులు సైతం వైరాగి కుటుంబం తీసుకున్న ప్రగతిశీల నిర్ణయాన్ని ప్రశంసించారు. వితంతువుల పట్ల సమాజంలో నెలకొన్న మూస ధోరణులను మార్చే దిశగా ఇదొక గొప్ప ముందడుగు అని అభిప్రాయపడ్డారు.