'హ్యాపీ రాజ్'లో ఇళయరాజా పాట వాడొద్దు: మద్రాస్ హైకోర్టు కీలక ఉత్తర్వులు

సంగీత దిగ్గజం ఇళయరాజా స్వరపరిచిన ఓ ప్రముఖ గీతాన్ని అనుమతి లేకుండా తమ చిత్రంలో వాడుకున్నారన్న ఆరోపణలపై 'హ్యాపీ రాజ్' చిత్ర బృందానికి మద్రాసు హైకోర్టులో చుక్కెదురైంది. తదుపరి ఉత్తర్వులు వెలువడే వరకు సదరు పాటను సినిమాలో ఉపయోగించరాదని న్యాయస్థానం మధ్యంతర ఉత్తర్వులు జారీ చేసింది. ప్రాథమికంగా కాపీరైట్ హక్కుల ఉల్లంఘన జరిగినట్లు నిర్ధారించిన కోర్టు ఈ మేరకు ఆదేశాలిచ్చింది.

వివరాల్లోకి వెళితే, 1980లో రజినీకాంత్ కథానాయకుడిగా విడుదలైన 'మురట్టుకాళై' చిత్రంలోని ఐకానిక్ గీతం "పొదువాగ ఎన్ మనసు తంగం"ను తన అనుమతి లేకుండా 'హ్యాపీ రాజ్' సినిమాలో వాడుకున్నారని ఇళయరాజా మద్రాసు హైకోర్టులో సివిల్ దావా వేశారు. జీవీ ప్రకాశ్ కుమార్ దర్శకత్వం వహించి, నటించిన ఈ చిత్రం మార్చి 27న థియేటర్లలో విడుదలైంది. తన స్వరకల్పనలోని పాటను మార్పులు చేసి, ఎటువంటి లైసెన్స్ లేకుండా వాణిజ్య ప్రయోజనాల కోసం వాడుకున్నారని ఇళయరాజా తన పిటిషన్‌లో పేర్కొన్నారు.

జస్టిస్ ఎం. కుమరేశ్ బాబు ఈ పిటిషన్‌పై విచారణ చేపట్టారు. ఇళయరాజా తరఫు న్యాయవాది వాదనలు విన్న అనంతరం, 'హ్యాపీ రాజ్' చిత్రంలో వివాదాస్పద గీతానికి సంబంధించిన వాడకాన్ని నిలిపివేయాలని ఆదేశించారు. ఈ వ్యవహారంపై స్పందించాలని కోరుతూ దర్శకుడు జీవీ ప్రకాశ్, నిర్మాతకు న్యాయస్థానం నోటీసులు జారీ చేసింది.