మైనస్ డిగ్రీల్లోనూ ప్రాణాలతో మనుగడ.. వైద్యరంగానికి ఆశాకిరణంగా ఆర్కిటిక్ ఉడుత!

ప్రకృతిలో కొన్ని జీవుల జీవనశైలి వైద్యశాస్త్రానికే మార్గం చూపుతుంది. ఆర్కిటిక్ ప్రాంతంలో నివసించే ఒక రకమైన ఉడుత (Arctic ground squirrel) ఇప్పుడు సరిగ్గా ఇదే పని చేస్తోంది. అత్యంత శీతల వాతావరణంలో తన శరీరాన్ని మంచుగడ్డలా మార్చుకుంటూ ప్రాణాలతో నిలిచే ఈ ఉడుత సామర్థ్యం.. గుండెపోటు, స్ట్రోక్‌ల వంటి ప్రాణాంతక సమస్యలకు కొత్త చికిత్సలను అందించగలదని శాస్త్రవేత్తలు భావిస్తున్నారు.

ఈ ఉడుతలు శీతాకాలంలో 7 నుంచి 8 నెలల పాటు సుదీర్ఘ నిద్రలోకి (hibernation) వెళతాయి. ఈ సమయంలో వాటి శరీర ఉష్ణోగ్రత సున్నా డిగ్రీల కంటే కిందకు, అంటే -2.9 డిగ్రీల సెల్సియస్‌కు పడిపోతుంది. గుండె, శ్వాస నిమిషానికి కొద్దిసార్లు మాత్రమే కొట్టుకుంటాయి. అయినా అవి ప్రాణాలతో ఉంటాయి. అలస్కా ఫెయిర్‌బ్యాంక్స్ యూనివర్సిటీ శాస్త్రవేత్తలు దశాబ్దాలుగా ఈ ఉడుతలపై పరిశోధనలు చేస్తున్నారు. అడినోసిన్ అనే రసాయనం, మెదడులోని హైపోథాలమస్ వీటి నిద్రను నియంత్రిస్తున్నాయని గుర్తించారు.

ఈ ఉడుత జీవక్రియను మనుషుల్లో అనుకరించగలిగితే వైద్యరంగంలో అద్భుతాలు చేయవచ్చని పరిశోధకులు చెబుతున్నారు. గుండెపోటు, బ్రెయిన్ స్ట్రోక్ లేదా తీవ్రమైన గాయాలైనప్పుడు, బాధితుడి జీవక్రియను నెమ్మదింపజేయడం ద్వారా అవయవాలు దెబ్బతినకుండా కాపాడవచ్చు. ఇది అవయవ మార్పిడికి అవసరమైన అవయవాలను ఎక్కువ కాలం భద్రపరచడానికి కూడా ఉపయోగపడుతుంది. ఇప్పటికే అడినోసిన్ వంటి రసాయనాలను ఎలుకలపై ప్రయోగించగా సత్ఫలితాలు వచ్చాయి. 

అయితే, ఈ పరిశోధనలు ఇంకా ప్రాథమిక దశలోనే ఉన్నాయని, మనుషులకు సురక్షితంగా వర్తింపజేయడానికి చాలా సమయం పడుతుందని శాస్త్రవేత్తలు స్పష్టం చేస్తున్నారు.