పెళ్లి వేడుకల్లో టేలర్ స్విఫ్ట్ ఆడంబరం.. అతిథులకు వజ్రాల గిఫ్టులు!

ప్రపంచవ్యాప్తంగా ఎంతో ఆసక్తి రేపిన పాప్ సింగర్ టేలర్ స్విఫ్ట్, అమెరికన్ ఫుట్‌బాల్ స్టార్ ట్రావిస్ కెల్సీల వివాహం అంగరంగ వైభవంగా జరిగింది. న్యూయార్క్‌లోని ప్రఖ్యాత మ్యాడిసన్ స్క్వేర్ గార్డెన్‌లో నిన్న‌ ఈ జంట ఒక్కటైన విషయం తెలిసిందే. అయితే, పెళ్లికి ముందు రోజు జరిగిన రిహార్సల్ డిన్నర్‌లో అతిథులకు వారు ఇచ్చిన ఖరీదైన బహుమతులు ఇప్పుడు హాట్ టాపిక్‌గా మారాయి. ఈ వేడుకకు హాజరైన ప్రతి ఒక్కరికీ వజ్రాలు పొదిగిన షాంపైన్ ఫ్లూట్స్‌ను (గ్లాసులు) బహుమతిగా ఇచ్చి అందరినీ ఆశ్చర్యపరిచారు.

ఈ నెల‌ 2న మ్యాడిసన్ స్క్వేర్ గార్డెన్‌లోని ఇన్ఫోసిస్ థియేటర్‌లో ఈ రిహార్సల్ డిన్నర్ జరిగింది. సుమారు 100 మంది సన్నిహితులు, కుటుంబ సభ్యులు, సెలబ్రిటీలు ఇందులో పాల్గొన్నారు. హాలీవుడ్ స్టార్స్ సెలెనా గోమెజ్, గిగీ హడిద్, బ్రాడ్లీ కూపర్ వంటి ప్రముఖులు ఈ డిన్నర్‌కు హాజరయ్యారు. వేడుక ముగిశాక బయటకు వస్తున్న అతిథుల చేతుల్లో నల్లటి వెల్వెట్ బాక్సులు కనిపించాయి. ఆ బాక్సులపై 'T&T' అనే అక్షరాలు, రెండు హృదయాల చిహ్నాలు ముద్రించి ఉన్నాయి.

సన్నిహిత వర్గాల కథనం ప్రకారం.. ప్రతి బాక్సులోనూ నిజమైన వజ్రాలు పొదిగిన ఒక పెద్ద షాంపైన్ గ్లాసు ఉంది. దానితో పాటు స్విఫ్ట్-కెల్సీల ఎంగేజ్‌మెంట్ ఫోటోల్లోని గార్డెన్ చిత్రాన్ని ముద్రించిన ఒక ఫ్యాబ్రిక్ ఇమేజ్, సిల్వర్ వ్యాక్స్ సీల్‌తో ఉన్న ఒక కమెమొరేటివ్ కార్డును కూడా ఉంచారు. ఈ బహుమతులు వారి పెళ్లి వేడుకల స్థాయిని, ప్రతి విషయంలో వారు తీసుకున్న శ్రద్ధను తెలియజేస్తున్నాయి.

2023లో డేటింగ్ ప్రారంభించిన ఈ జంట, 2025లో తమ ఎంగేజ్‌మెంట్ ప్రకటించారు. తమ పెళ్లి వేడుక కోసం న్యూయార్క్‌లోని ఐకానిక్ వేదికను ఎంచుకోవడంతో మీడియా దృష్టి మొత్తం వారిపైనే కేంద్రీకృతమైంది. ఈ గిఫ్టుల గురించి స్విఫ్ట్, కెల్సీల నుంచి అధికారికంగా ఎలాంటి ప్రకటన రానప్పటికీ, ఈ ఖరీదైన బహుమతులు వారి వివాహ వేడుకలకు గుర్తుగా నిలిచిపోతాయని అందరూ చర్చించుకుంటున్నారు.