విటమిన్ల లోపంతో బరువు పెరుగుతారా?.. నిపుణులు ఏం చెబుతున్నారు?

బరువు తగ్గడానికి ఎన్నో ప్రయత్నాలు చేసి విఫలమవుతున్నారా? సరైన ఆహారం తీసుకుంటున్నా, వ్యాయామం చేస్తున్నా ఊబకాయం సమస్య వేధిస్తోందా? అయితే, మీ శరీరంలో కొన్ని కీలకమైన విటమిన్లు లోపించ‌డం కూడా దీనికి ఒక కార‌ణం కావొచ్చ‌నేది నిపుణుల అభిప్రాయం. ప్రపంచవ్యాప్తంగా పెరుగుతున్న ఊబకాయం సమస్యపై ఆందోళనలు వ్యక్తమవుతున్న నేపథ్యంలో పోషకాహార లోపానికి, అధిక బరువుకు మధ్య ఉన్న సంబంధంపై ఆసక్తికరమైన విశ్లేషణలు వెలుగులోకి వస్తున్నాయి. ముఖ్యంగా విటమిన్ 'డి', విటమిన్ 'బి12' వంటి పోషకాల లోపం బరువు పెరగడానికి పరోక్షంగా కారణమవుతుందని నిపుణులు చెబుతున్నారు.

విటమిన్ల లోపం బరువును ఎలా ప్రభావితం చేస్తుంది?
మన శరీరంలో జీవక్రియలు సక్రమంగా జరగాలన్నా, శక్తి సరిగ్గా వినియోగం కావాలన్నా విటమిన్లు చాలా అవసరం. వీటిలో ఏవి లోపించినా దాని ప్రభావం ఆరోగ్యంపై, ప్రత్యేకించి బరువుపై పడుతుంది.

విటమిన్ 'డి': ఎముకల ఆరోగ్యానికే కాకుండా జీవక్రియను నియంత్రించడంలో విటమిన్ 'డి' కీలక పాత్ర పోషిస్తుంది. ఇది లోపించినప్పుడు, ఆకలిని నియంత్రించే లెప్టిన్, గ్రెలిన్ వంటి హార్మోన్ల పనితీరు దెబ్బతింటుంది. ఫలితంగా, ఆకలి పెరగడం, జీవక్రియ రేటు మందగించడం జరిగి, బరువు పెరిగేందుకు దారితీస్తుంది. సురక్షితమైన సూర్యరశ్మి, కొవ్వు అధికంగా ఉండే చేపలు, గుడ్డు సొన, పుట్టగొడుగులు, ఫోర్టిఫైడ్ పాలు వంటి వాటి ద్వారా విటమిన్ 'డి' పొందవచ్చు.

విటమిన్ బి12: మనం తీసుకున్న ఆహారాన్ని శక్తిగా మార్చడంలో విటమిన్ 'బి12' ప్రధాన పాత్ర పోషిస్తుంది. ఈ విటమిన్ లోపిస్తే తీవ్రమైన నీరసం, అలసట ఆవరిస్తాయి. దీంతో శారీరక శ్రమ చేసేందుకు శరీరం సహకరించదు. వ్యాయామం, ఇతర పనులకు దూరంగా ఉండటం వల్ల కేలరీలు ఖర్చు కాక, క్రమంగా బరువు పెరిగే ప్రమాదం ఉంటుంది. చేపలు, గుడ్లు, పాల ఉత్పత్తులు, ఫోర్టిఫైడ్ ఆహారాల్లో విటమిన్ 'బి12' సమృద్ధిగా లభిస్తుంది. కేవలం ఈ రెండే కాకుండా ప్రోటీన్, కాల్షియం, ఫైబర్, జింక్, మెగ్నీషియం, ఐరన్ వంటి ఇతర పోషకాల లోపం కూడా బరువు పెరగడానికి కారణం కావచ్చని నిపుణులు వివరిస్తున్నారు.

ఇదొక సంక్లిష్టమైన సంబంధం
విటమిన్ల లోపం వల్ల బరువు పెరుగుతారనేది వాస్తవమే అయినా, ఈ సంబంధం చాలా సంక్లిష్టమైనదని నిపుణులు స్పష్టం చేస్తున్నారు. కొన్నిసార్లు దీనికి పూర్తి విరుద్ధంగా కూడా జరుగుతుంది. అంటే.. అధిక బరువు లేదా ఊబకాయం కూడా శరీరంలో విటమిన్ల లోపానికి కారణం కావచ్చు. ఉదాహరణకు, అధిక కొవ్వు కణజాలంలో విటమిన్ 'డి' పేరుకుపోయి, రక్తంలో దాని స్థాయులు తగ్గిపోతాయని పలు అధ్యయనాలు నిరూపించాయి. బరువు తగ్గిన వారిలో విటమిన్ 'డి' స్థాయులు మెరుగుపడటం ఈ వాదనకు బలం చేకూరుస్తోంది.

అందుకే బరువు తగ్గలేకపోతున్నామనే కారణంతో సొంతంగా విటమిన్ సప్లిమెంట్లను వాడటం ప్రమాదకరమని వైద్యులు హెచ్చరిస్తున్నారు. ముందుగా వైద్యులను సంప్రదించి, అవసరమైన రక్త పరీక్షలు చేయించుకోవాలి. వారి సూచన మేరకే మందులు వాడాలి. సమతుల్య ఆహారం, క్రమం తప్పని వ్యాయామం, సురక్షితమైన సూర్యరశ్మి వంటి ప్రాథమిక ఆరోగ్య సూత్రాలను పాటిస్తే చాలా వరకు ఈ సమస్యలను అధిగమించవచ్చని నిపుణులు భరోసా ఇస్తున్నారు.