ఏఐ దెబ్బకు ఫోర్డ్ యూటర్న్.. పాత ఇంజనీర్లను వెనక్కి పిలిపిస్తున్న సంస్థ
- ఏఐ, ఆటోమేటెడ్ వ్యవస్థలపై ఆధారపడి నాణ్యతలో దెబ్బతిన్న ఫోర్డ్
- నాణ్యత పెంచేందుకు 350 మంది అనుభవజ్ఞులైన ఇంజనీర్లను వెనక్కి పిలిచిన వైనం
- ఏఐకి శిక్షణ ఇచ్చి, యువ ఇంజనీర్లకు మార్గనిర్దేశం చేస్తున్న నిపుణులు
- ఈ మార్పులతో క్వాలిటీ సర్వేలలో అగ్రస్థానానికి చేరిన ఫోర్డ్
'బ్లూమ్బర్గ్' కథనం ప్రకారం గత మూడేళ్లలో ఫోర్డ్ సుమారు 350 మంది అనుభవజ్ఞులైన ఇంజనీర్లను తిరిగి నియమించుకుంది. వీరిలో కంపెనీ మాజీ ఉద్యోగులతో పాటు, ఇతర అనుబంధ సంస్థలలో పనిచేసిన నిపుణులు కూడా ఉన్నారు. దశాబ్దాల పాటు వివిధ వాహనాల తయారీలో పనిచేసిన ఉద్యోగుల అనుభవాన్ని విస్మరించి, పూర్తిగా ఆటోమేషన్పై ఆధారపడటం పొరపాటని కంపెనీ ఉన్నతాధికారులు అంగీకరించారు.
ఈ విషయంపై ఫోర్డ్ వెహికల్ హార్డ్వేర్ ఇంజనీరింగ్ వైస్ ప్రెసిడెంట్ చార్లెస్ పూన్ మాట్లాడుతూ.. "కేవలం ఆర్టిఫిషియల్ ఇంటెలిజెన్స్ను ప్రవేశపెడితే సరిపోతుందని, అదే అత్యుత్తమ నాణ్యత గల ఉత్పత్తిని ఇస్తుందని పొరపాటుగా భావించాం. ఏఐ ఒక అద్భుతమైన సాధనమే అయినా, దానికి శిక్షణ ఇవ్వడానికి ఉపయోగించే సమాచారంపైనే దాని సామర్థ్యం ఆధారపడి ఉంటుంది" అని వివరించారు. అనుభవజ్ఞులైన ఇంజనీర్లు కంపెనీని విడిచి వెళ్లే ముందు వారి విజ్ఞానాన్ని భద్రపరచడంలో విఫలమయ్యామని, దానివల్లే ఏఐ వ్యవస్థలు వాస్తవ ప్రపంచంలోని సమస్యలను ముందుగా గుర్తించలేకపోయాయని ఆయన అంగీకరించారు.
ప్రస్తుతం తిరిగి విధుల్లో చేరిన ఈ నిపుణులను కంపెనీలో "గ్రే బియర్డ్స్" (అనుభవజ్ఞులు) అని పిలుస్తున్నారు. వీరు యువ ఇంజనీర్లకు మార్గనిర్దేశం చేయడం, ఏఐ టూల్స్కు మెరుగైన శిక్షణ ఇవ్వడం, వాహనాలు ఫ్యాక్టరీకి చేరకముందే నాణ్యతా సమస్యలను గుర్తించడం వంటి కీలక బాధ్యతలు నిర్వర్తిస్తున్నారు. ఫోర్డ్ చీఫ్ ఆపరేటింగ్ ఆఫీసర్ కుమార్ గల్హోత్రా మాట్లాడుతూ, "సమస్యను గుర్తించి సరిదిద్దడం కాకుండా, సమస్య రాకముందే నివారించే దిశగా మేము మారుతున్నాం. ఈ మార్పుకు మా అనుభవజ్ఞులైన ఇంజనీర్లే గుండెకాయ వంటివారు" అని తెలిపారు.
ఈ మార్పులు కేవలం వాహన హార్డ్వేర్కే పరిమితం కాలేదు. సాఫ్ట్వేర్, మాన్యుఫ్యాక్చరింగ్, సప్లై-చెయిన్ బృందాలు ఇప్పుడు మరింత సమన్వయంతో పనిచేస్తున్నాయి. వాహనాలు కస్టమర్లకు చేరేలోపే సాఫ్ట్వేర్ విశ్వసనీయతను మెరుగుపరిచేందుకు 40 మంది సభ్యులతో ప్రత్యేకంగా ఒక క్వాలిటీ అస్యూరెన్స్ బృందాన్ని కూడా ఫోర్డ్ ఏర్పాటు చేసింది.
అయితే, ఫోర్డ్ ఏఐని పూర్తిగా పక్కన పెట్టడం లేదు. బదులుగా, అనుభవజ్ఞులైన ఇంజనీర్ల నుంచి సేకరించిన విలువైన సమాచారంతో ఏఐని మరింత తెలివైనదిగా మారుస్తోంది. వివిధ క్లిష్ట పరిస్థితులలో వాహన సాఫ్ట్వేర్ను పరీక్షించడానికి 1,00,000కు పైగా కొత్త ఏఐ-పవర్డ్ వాలిడేషన్ టెస్టులను జోడించినట్లు కంపెనీ తెలిపింది. ఈ విధంగా మానవ అనుభవాన్ని, ఆర్టిఫిషియల్ ఇంటెలిజెన్స్ను సమన్వయం చేస్తూ నాణ్యమైన ఉత్పత్తులను అందించడమే లక్ష్యంగా ఫోర్డ్ ముందుకు సాగుతోంది.
