సౌదీ ప్రయాణికులకు అలర్ట్: బంగారంపై కొత్త నిబంధనలు

సౌదీ అరేబియాకు వెళ్లే, అక్కడి నుంచి వచ్చే ప్రయాణికుల కోసం ఆ దేశ ప్రభుత్వం కీలక మార్గదర్శకాలను విడుదల చేసింది. మనీలాండరింగ్ నిరోధక చర్యల్లో భాగంగా బంగారం, ఆభరణాలు, ఇతర విలువైన వస్తువులు రవాణాపై నిబంధనలను మరింత కఠినతరం చేసింది. గతంలో ఉన్న 60,000 సౌదీ రియాల్స్ డిక్లరేషన్ పరిమితిని ప్రస్తుతం 40,000 రియాల్స్‌కు తగ్గిస్తూ నిర్ణయం తీసుకుంది.

సౌదీ అరేబియాలోని జకాత్, ట్యాక్స్ అండ్ కస్టమ్స్ అథారిటీ ఈ కొత్త నిబంధనలను అమలు చేస్తోంది. దీని ప్రకారం, ఎవరైనా 40,000 సౌదీ రియాల్స్ (సుమారు రూ. 10 లక్షలు) లేదా అంతకంటే ఎక్కువ విలువైన నగదు, బంగారం, విలువైన లోహాలు, రత్నాలు లేదా ఆభరణాలు తీసుకెళుతున్నట్లయితే కస్టమ్స్ అధికారులకు తప్పనిసరిగా రాతపూర్వక డిక్లరేషన్ సమర్పించాలి. వీటికి సంబంధించిన కొనుగోలు ఇన్‌వాయిస్‌లను కూడా అధికారులకు చూపించాల్సి ఉంటుంది.

ఈ నిబంధనలను ఉల్లంఘిస్తే కఠిన చర్యలు తప్పవని అధికారులు హెచ్చరించారు. సరైన వివరాలు వెల్లడించని పక్షంలో, సదరు వస్తువులను 72 గంటల పాటు తాత్కాలికంగా జప్తు చేస్తారు. మొదటిసారి నిబంధనలు ఉల్లంఘించిన వారికి (మనీ లాండరింగ్ ఉద్దేశం లేదని నిర్ధారణ అయితే), స్వాధీనం చేసుకున్న వస్తువుల విలువలో 10 నుంచి 25 శాతం వరకు జరిమానా విధిస్తారు. ఈ ఉల్లంఘన పునరావృతమైతే జరిమానాను 50 శాతానికి పెంచే అవకాశం ఉంది. ఒకవేళ నేరపూరిత ఉద్దేశాలు ఉన్నట్లు అనుమానిస్తే, సదరు కేసును పబ్లిక్ ప్రాసిక్యూషన్‌కు బదిలీ చేస్తారు.

ఈ కొత్త నిబంధనలు భారత్ సహా ఇతర గల్ఫ్ దేశాలకు ప్రయాణించే ప్రవాసులపై ప్రధానంగా ప్రభావం చూపనున్నాయి. ప్రయాణికులు తమ వెంట తీసుకెళ్లే విలువైన వస్తువులకు సంబంధించిన అసలు రశీదులను భద్రపరుచుకోవాలని మరియు ప్రయాణానికి ముందు తాజా నిబంధనలను సరిచూసుకోవాలని అధికారులు సూచిస్తున్నారు.