‘జననాయగన్’ నిర్మాతకు కీలక పదవి ఇచ్చిన సీఎం విజయ్.. తమిళనాట రాజకీయ దుమారం
- ఢిల్లీలో తమిళనాడు ప్రభుత్వ ప్రత్యేక ప్రతినిధిగా వెంకట నారాయణ నియామకం
- సీఎం విజయ్ నటించిన ‘జననాయగన్’ సినిమాకు ఆయనే నిర్మాత
- నిర్మాత నియామకంపై ప్రతిపక్ష డీఎంకే నుంచి తీవ్ర విమర్శలు
- ప్రభుత్వ ప్రతిష్ఠకు భంగం కలిగించే చర్య అని డీఎంకే ఎంపీ ఆరోపణ
- విమర్శలపై ఇంకా స్పందించని సీఎం విజయ్ సర్కార్
ప్రభుత్వ ఉత్తర్వుల ప్రకారం వెంకట నారాయణ ఈ పదవిలో బాధ్యతలు స్వీకరించిన నాటి నుంచి ఏడాది పాటు తాత్కాలిక ప్రాతిపదికన కొనసాగుతారు. ఆయన నియామకానికి సంబంధించిన ఇతర నిబంధనలు, షరతులను త్వరలో వెల్లడిస్తామని ప్రభుత్వం పేర్కొంది. కెవిఎన్ ప్రొడక్షన్స్ పతాకంపై హెచ్. వినోద్ దర్శకత్వంలో ‘జననాయగన్’ చిత్రాన్ని వెంకట నారాయణ నిర్మించారు.
ముఖ్యమంత్రి విజయ్తో వెంకట నారాయణకు ఉన్న సన్నిహిత సంబంధాల కారణంగానే ఈ నియామకం వివాదాస్పదంగా మారింది. గత మే నెలలో విజయ్ ప్రభుత్వాన్ని ఏర్పాటు చేసేందుకు గవర్నర్ ఆర్.వి. అర్లేకర్ను కలిసినప్పుడు కూడా వెంకట నారాయణ ఆయన వెంటే ఉన్నారు. ఇదిలా ఉంటే.. ‘జననాయగన్’ చిత్రం కూడా ఇటీవల వార్తల్లో నిలిచింది. సెంట్రల్ బోర్డ్ ఆఫ్ ఫిల్మ్ సర్టిఫికేషన్ (సిబిఎఫ్సి) నుంచి అనుమతులు ఆలస్యం కావడం, విడుదలకు ముందే సినిమా ఆన్లైన్లో లీక్ కావడం వంటి సమస్యలను ఈ చిత్రం ఎదుర్కొన్న విషయం తెలిసిందే. ఇప్పటికీ ఈ మూవీ విడుదల ఇంకా సందిగ్ధంలోనే ఉంది.
నియామకంపై డీఎంకే తీవ్ర అభ్యంతరం
ఈ నియామకాన్ని ప్రతిపక్ష డీఎంకే తీవ్రంగా తప్పుపట్టింది. డీఎంకే రాజ్యసభ ఎంపీ పి. విల్సన్ మాట్లాడుతూ.. ఒక సినిమా నిర్మాతను కీలకమైన పరిపాలనా పదవిలో నియమించడం ఆ పదవి ప్రాముఖ్యతను దెబ్బతీయడమేనని విమర్శించారు. రాష్ట్ర ప్రభుత్వానికి, కేంద్ర ప్రభుత్వానికి మధ్య ప్రత్యేక ప్రతినిధి కీలకమైన వారధిగా వ్యవహరిస్తారని ఆయన గుర్తుచేశారు.
కేంద్ర మంత్రులతో సమన్వయం చేయడం, ఢిల్లీలో ముఖ్యమంత్రి సమావేశాలను ఏర్పాటు చేయడం, రాష్ట్రానికి సంబంధించిన కేంద్ర విధానాలపై సమాచారం అందించడం, పార్లమెంట్ సమావేశాల సమయంలో రాష్ట్ర ఎంపీలకు అవసరమైన అధికారిక సమాచారాన్ని చేరవేయడం వంటి కీలక బాధ్యతలు ఈ పదవిలో ఉంటాయని విల్సన్ వివరించారు. ప్రభుత్వానికి నచ్చిన వ్యక్తిని నియమించుకునే అధికారం ఉన్నప్పటికీ, రాష్ట్ర పరిపాలనా ప్రయోజనాలను దృష్టిలో ఉంచుకుని ఈ పదవిని భర్తీ చేయాలని సూచించారు. ఒక సినిమా నిర్మాతను నియమించడం వల్ల జాతీయ రాజధానిలో రాష్ట్రం నవ్వులపాలు అవుతుందని ఆయన తీవ్ర ఆరోపణలు చేశారు. ఈ విమర్శలపై తమిళనాడు ప్రభుత్వం ఇప్పటివరకు అధికారికంగా స్పందించలేదు.
