వృద్ధాప్యంపై మీ ఆలోచనే మీ ఆరోగ్యం.. 'యేల్' అధ్యయనంలో ఆసక్తికర విషయాలు

వయసు పైబడటం అంటే కేవలం ఆరోగ్యం క్షీణించడమే అనే సాధారణ భావనను సవాలు చేస్తూ యేల్ యూనివర్సిటీ ఒక కీలక అధ్యయనాన్ని వెల్లడించింది. వృద్ధాప్యంపై సానుకూల దృక్పథం కలిగిన వారిలో జ్ఞాపకశక్తి, శారీరక సామర్థ్యం మెరుగుపడినట్లు ఈ పరిశోధనలో తేలింది. వృద్ధులలో సగం మందికి పైగా ఆరోగ్యంలో పురోగతి సాధిస్తున్నారని, వయసు పెరగడం అంటే అది కేవలం అనివార్యమైన క్షీణత మాత్రమే కాదని ఈ అధ్యయనం స్పష్టం చేసింది.

ప్రముఖ అంతర్జాతీయ జర్నల్ 'జెరియాట్రిక్స్'లో ప్రచురితమైన ఈ అధ్యయనం కోసం, 65 ఏళ్లకు పైబడిన 11,000 మందికి పైగా అమెరికన్ల ఆరోగ్య సమాచారాన్ని 12 ఏళ్ల పాటు విశ్లేషించారు. వీరిలో దాదాపు 45.15 శాతం మందిలో మెదడు పనితీరు లేదా శారీరక చురుకుదనంలో స్పష్టమైన మెరుగుదల కనిపించింది. సుమారు 32 శాతం మందిలో జ్ఞాపకశక్తి, 28 శాతం మందిలో నడక వేగం పెరిగినట్లు గుర్తించారు. వృద్ధుల ఆరోగ్యానికి నడక వేగాన్ని ఒక ముఖ్య సూచికగా పరిగణిస్తారు.

ఈ అధ్యయనానికి నేతృత్వం వహించిన యేల్ స్కూల్ ఆఫ్ పబ్లిక్ హెల్త్ ప్రొఫెసర్ డాక్టర్ బెక్కా ఆర్. లెవీ మాట్లాడుతూ, "చాలామంది వృద్ధాప్యాన్ని శారీరక, మానసిక సామర్థ్యాలు క్షీణించే ఒక అనివార్య ప్రక్రియగా భావిస్తారు. కానీ వృద్ధాప్యంలో ఆరోగ్యం మెరుగుపడటం అరుదైన విషయం కాదు, అది చాలా సాధారణం" అని స్పష్టం చేశారు.

అధ్యయనం ప్రారంభంలో వృద్ధాప్యంపై ఎవరైతే సానుకూల అభిప్రాయం కలిగి ఉన్నారో, వారిలోనే ఈ మెరుగుదల ఎక్కువగా కనిపించింది. వయసు, లింగం, విద్య, దీర్ఘకాలిక వ్యాధులు వంటి అంశాలను పరిగణనలోకి తీసుకున్న తర్వాత కూడా ఇదే ఫలితం రావడం గమనార్హం. 

సమాజంలో వృద్ధాప్యంపై ఉండే నమ్మకాలు వ్యక్తుల జీవక్రియలు, పనితీరుపై ప్రభావం చూపుతాయన్న సిద్ధాంతానికి ఈ ఫలితాలు బలం చేకూరుస్తున్నాయి. వ్యాయామం, సరైన ఆహారం వంటి సంప్రదాయ పద్ధతులతో పాటు సానుకూల ఆలోచనలను ప్రోత్సహించడం ద్వారా వృద్ధులలో ఆరోగ్యకరమైన జీవితాన్ని పెంపొందించవచ్చని నిపుణులు అభిప్రాయపడుతున్నారు.