కుందేళ్ల గురించి చాలామందికి తెలియని ఆసక్తికర విషయాలు..!

పొడవాటి చెవులు, ముద్దుగా కనిపించే రూపం, క్యారెట్లు తింటూ ఉండే అలవాటు. చాలామందికి కుందేలు అంటే గుర్తొచ్చేవి ఇవే. కానీ నిజానికి ఈ చిన్న జీవుల్లో ఎన్నో ఆశ్చర్యకరమైన ప్రత్యేకతలు దాగి ఉన్నాయి. వాటి జీవన విధానం, శరీర నిర్మాణం, ప్రవర్తన గురించి తెలుసుకుంటే ఆశ్చర్యపోవాల్సిందే. కుందేళ్ల గురించి చాలామందికి తెలియని ఆసక్తికర విషయాలు ఇవీ..

కుందేళ్ల దంతాలు జీవితాంతం పెరుగుతాయి
మనుషుల దంతాలు ఒక దశ తర్వాత పెరగడం ఆగిపోతుంది. కానీ కుందేళ్ల విషయంలో అలా కాదు. వాటి దంతాలు జీవితాంతం పెరుగుతూనే ఉంటాయి. అందుకే అవి తరచూ గడ్డి, ఆకులు, ఇతర పీచు పదార్థాలను నములుతుంటాయి. ఇలా చేయకపోతే పళ్లు మరీ పొడవుగా పెరిగి ఆరోగ్య సమస్యలకు దారితీసే ప్రమాదం ఉంటుంది.

తల తిప్పకుండానే
కుందేళ్ల కళ్ల స్థానం ప్రత్యేకంగా ఉంటుంది. తలకు రెండు వైపులా ఉండటం వల్ల అవి చాలా విస్తృతంగా చూడగలుగుతాయి. దీంతో శత్రువులు దగ్గరకు రాగానే వెంటనే గుర్తించే అవకాశం ఉంటుంది.

సంతోషంగా ఉంటే
కుందేలు ఆనందంగా ఉన్నప్పుడు ఒక్కసారిగా గాల్లోకి ఎగిరి శరీరాన్ని తిప్పి, కాళ్లను విసిరేలా గెంతుతుంది. దీనిని ‘బింకీ’ అని పిలుస్తారు. ఇది కుందేళ్లలో ఆనందానికి సంకేతంగా భావిస్తారు. పెంపుడు కుందేళ్ల యజమానులు దీన్ని తరచూ గమనిస్తుంటారు.

క్యారెట్లు వాటి ప్రధాన ఆహారం కాదు
కార్టూన్లు, సినిమాల ప్రభావంతో కుందేళ్లు క్యారెట్లనే ఎక్కువగా తింటాయని చాలామంది భావిస్తారు. కానీ అది పూర్తిగా నిజం కాదు. వాటి ప్రధాన ఆహారం గడ్డి, ఆకులు, ఇతర పచ్చి మొక్కలే. క్యారెట్లలో సహజ చక్కెర ఎక్కువగా ఉండటంతో వాటిని అప్పుడప్పుడే ఇవ్వాలని నిపుణులు సూచిస్తారు.

తల్లి కుందేళ్లు పిల్లలతో ఎక్కువసేపు ఉండవు
ఇది వినడానికి ఆశ్చర్యంగా అనిపించొచ్చు. అడవిలో ఉండే తల్లి కుందేళ్లు పిల్లల దగ్గర ఎక్కువసేపు గడపవు. రోజులో కొన్నిసార్లు మాత్రమే వచ్చి వాటికి ఆహారం ఇస్తాయి. ఇలా చేయడం వల్ల శత్రు జంతువులు గూడును గుర్తించే ప్రమాదం తగ్గుతుంది. అందుకే ఒంటరిగా కుందేలు పిల్లలు కనిపిస్తే, వాటిని తల్లులు వదిలేశాయని మనం అనుకోవాల్సిన అవసరం లేదు.

చాలా వేగంగా పరిగెడతాయి
ప్రశాంతంగా కూర్చున్న కుందేలు ప్రమాదం ఎదురైతే క్షణాల్లో వేగంగా పరుగెత్తగలదు. వెనుక కాళ్లు బలంగా ఉండటంతో దిశలను వేగంగా మార్చుకుంటూ పరుగెత్తుతుంది. ఈ జిగ్‌జాగ్‌ కదలికల వల్ల శత్రువులు దాన్ని పట్టుకోవడం కష్టమవుతుంది.