మళ్లీ నీట్ పేపర్ లీక్ అంటూ ప్రచారం.. స్పందించిన ఎన్టీఏ

నీట్-యూజీ 2026 రీటెస్ట్ ప్రశ్నాపత్రం లీక్ అయిందంటూ సామాజిక మాధ్యమాల్లో వైరల్ అవుతున్న వీడియోను నేషనల్ టెస్టింగ్ ఏజెన్సీ (ఎన్టీఏ) తీవ్రంగా ఖండించింది. ఆ వీడియో పూర్తిగా కల్పితమని, అందులోని వాదనలు అవాస్తవమని సోమవారం స్పష్టం చేసింది. ఇటువంటి తప్పుడు ప్రచారాలను విద్యార్థులు, తల్లిదండ్రులు నమ్మవద్దని ఈ సందర్భంగా విజ్ఞప్తి చేసింది.

మే నెలలో జరిగిన పరీక్షపై పేపర్ లీక్ ఆరోపణలు రావడంతో, దానిని రద్దు చేసి జూన్ 21న నీట్ రీ-ఎగ్జామ్‌ను తిరిగి నిర్వహించారు. సుమారు 20 లక్షల మంది విద్యార్థులు ఈ పరీక్షకు హాజరయ్యారు. అయితే, పరీక్ష జరిగిన మరుసటి రోజే పేపర్ లీక్ అయిందంటూ ఒక వీడియో సోషల్ మీడియాలో చక్కర్లు కొట్టింది. దీనిపై ఎన్టీఏ వెంటనే స్పందిస్తూ, "అత్యంత పటిష్ఠమైన భద్రత, నిఘా మధ్య పరీక్షను విజయవంతంగా పూర్తి చేశాం. వైరల్ అవుతున్న ఆ వీడియో నకిలీది" అని ప్రకటనలో పేర్కొంది.

ప్రెస్ ఇన్ఫర్మేషన్ బ్యూరో (పీఐబీ) ఫ్యాక్ట్-చెక్ విభాగం కూడా ఈ వీడియోను నిశితంగా పరిశీలించి, అందులో పలు వ్యత్యాసాలు ఉన్నాయని వెల్లడించింది. ముఖ్యంగా, ప్రశ్నపత్రాల ప్యాకెట్‌లో తప్పనిసరిగా ఉండాల్సిన ఓఎంఆర్ ఆన్సర్ షీట్ ఆ వీడియోలో లేకపోవడాన్ని గుర్తించింది. పరీక్షకు ముందు ప్రశ్నపత్రాలు బయటకు వచ్చే ఆస్కారమే లేదని స్పష్టం చేసింది.

సీసీటీవీ కెమెరాలు, సిగ్నల్ జ్యామర్లు, బయోమెట్రిక్ వంటి కట్టుదిట్టమైన ఏర్పాట్ల మధ్య రికార్డు సమయంలో ఎటువంటి పొరపాట్లకు తావులేకుండా పరీక్ష నిర్వహించామని ఎన్టీఏ డైరెక్టర్ జనరల్ అభిషేక్ సింగ్ తెలిపారు. తప్పుడు సమాచారాన్ని వ్యాప్తి చేస్తూ విద్యార్థులను గందరగోళానికి గురిచేసే వారిపై చట్టపరమైన చర్యలు తప్పవని ఆయన హెచ్చరించారు.