విజయవాడలో యోగా వేడుకలు.. బాబా రామ్‌దేవ్‌తో కలిసి సీఎం చంద్రబాబు సాధన

అంతర్జాతీయ యోగా దినోత్సవం పురస్కరించుకుని విజయవాడలో నిర్వహించిన వేడుకలు ప్రత్యేక ఆకర్షణగా నిలిచాయి. స్థానిక ఇందిరాగాంధీ మున్సిపల్ స్టేడియంలో జరిగిన ఈ కార్యక్రమంలో ముఖ్యమంత్రి నారా చంద్రబాబు నాయుడు, ప్రముఖ యోగా గురువు బాబా రామ్‌దేవ్ పాల్గొన్నారు. వేలాది మంది యోగా సాధకులతో కలిసి వారు యోగాసనాలు వేశారు.

ఈ సందర్భంగా ముఖ్యమంత్రి చంద్రబాబు నాయుడు అత్యంత ఉత్సాహంగా యోగా సాధన చేశారు. ముఖ్యంగా, బాబా రామ్‌దేవ్ స్వయంగా ముఖ్యమంత్రితో అనులోమ-విలోమ ప్రాణాయామం చేయించడం అందరి దృష్టిని ఆకర్షించింది. అనంతరం రామ్‌దేవ్ శిష్యులు ప్రదర్శించిన క్లిష్టమైన యోగాసనాలు ప్రేక్షకులను ఎంతగానో ఆకట్టుకున్నాయి.

ఈ సందర్భంగా బాబా రామ్‌దేవ్ మాట్లాడుతూ, యోగాను నిత్యజీవితంలో అంతర్భాగం చేసుకోవడం ద్వారా సంపూర్ణ ఆరోగ్యాన్ని సిద్ధింపజేసుకోవచ్చని పేర్కొన్నారు. ఈ వేడుకల్లో కేంద్ర మంత్రులు భూపతిరాజు శ్రీనివాస వర్మ, రామ్మోహన్ నాయుడు, రాష్ట్ర మంత్రులు నారా లోకేశ్, అచ్చెన్నాయుడు తదితర ప్రముఖులు పాల్గొని యోగా సాధన చేశారు. కార్యక్రమ ప్రారంభంలో వేంకటేశ్వర సుప్రభాతం, గోవింద నామస్మరణతో స్టేడియం ప్రాంగణమంతా ఆధ్యాత్మిక శోభ సంతరించుకుంది.