అంగారకుడిపై కొత్త రహస్యం.. శాస్త్రవేత్తలను ఆశ్చర్యపరిచిన రాయి!
- అంగారకుడి ఉల్క శకలంలో కొత్త రకం రాయి
- తొలిసారిగా గార్నెట్ ఖనిజం గుర్తింపు
- NWA 8171 నమూనాపై పరిశోధన
- లేజర్, ఎలక్ట్రాన్ సూక్ష్మదర్శినులతో విశ్లేషణ
- కోట్ల ఏళ్ల చరిత్రకు ఆధారమని అంచనా
- మరిన్ని పరీక్షల తర్వాతే పూర్తి స్పష్టత
కెనడా మ్యూజియంలో నమూనా
ఈ పరిశోధనలో ఉపయోగించిన ఉల్క శకలం పేరు NWA 8171. ఇది ప్రస్తుతం కెనడాలోని రాయల్ ఓంటారియో మ్యూజియంలో ఉంది. నమూనాపై ప్రాథమిక రసాయన పరీక్షలు నిర్వహించినప్పుడు కొన్ని అసాధారణ లక్షణాలు కనిపించాయి. దీంతో శాస్త్రవేత్తలు లేజర్ పరికరాలు, ఎలక్ట్రాన్ సూక్ష్మదర్శినుల సాయంతో మరింత లోతుగా పరిశీలించారు.
గార్నెట్ ఖనిజం గుర్తింపు
పరిశీలనలో ‘గార్నెట్’ అనే ముదురు ఎరుపు రంగు ఖనిజం ఉన్నట్లు తేలింది. పురాతన ఈజిప్టు, రోమన్ నాగరికతల్లో ఈ ఖనిజానికి ప్రత్యేక ప్రాధాన్యం ఉండేది. భూమిపై భూగర్భ మార్పులు, అధిక ఉష్ణోగ్రతలు, పీడన పరిస్థితులను అధ్యయనం చేయడంలో గార్నెట్ కీలకంగా ఉపయోగపడుతుంది. అంగారకుడి నమూనాలో ఇది కనిపించడం శాస్త్రవేత్తలకు ఆశ్చర్యం కలిగించింది.
కోట్ల ఏళ్ల చరిత్రకు ఆధారం
ఈ రాయి అంగారకుడి పురాతన భౌగోళిక చరిత్రను దాచుకున్న ఖజానాగా పనిచేస్తుందని నిపుణులు భావిస్తున్నారు. జేమ్స్ డార్లింగ్ నేతృత్వంలోని పరిశోధక బృందం ప్రకారం.. ఈ ఆవిష్కరణ అంగారకుడి భూగర్భ నిర్మాణంపై కొత్త కోణాన్ని చూపిస్తోంది. అక్కడ గతంలో జరిగిన భారీ మార్పులకు ఇది ఆధారంగా నిలిచే అవకాశం ఉందని పేర్కొంది.
ఇంకా మిగిలిన సందేహాలు
గార్నెట్ సాధారణంగా తీవ్రమైన వేడి, పీడన పరిస్థితుల్లో ఏర్పడుతుంది. అంగారకుడిపై భారీ ఉల్క ఢీకొనడం లేదా లోపలి మాగ్మా పైకి రావడం వల్ల ఇది ఏర్పడి ఉండొచ్చని పరిశోధకులు అంచనా వేస్తున్నారు. మరోవైపు ఈ రాయి అసలు అంగారకుడిదే కాకపోవచ్చన్న అవకాశాన్ని కూడా కొట్టిపారేయడం లేదు. మరిన్ని పరీక్షల తర్వాతే దీనిపై స్పష్టత వస్తుందని శాస్త్రవేత్తలు తెలిపారు.
