మీ ఇంట్లో ఆడవాళ్లు లేరా?.. గుడివాడ అమర్నాథ్‌కు హోంమంత్రి అనిత స్ట్రాంగ్ కౌంటర్

తన చదువు, వేషధారణ, రూపంపై వ్యక్తిగత విమర్శలు చేస్తున్న వైసీపీ నేతలకు ఆంధ్రప్రదేశ్ హోంమంత్రి వంగలపూడి అనిత ఘాటుగా బదులిచ్చారు. ఇలాంటి అనుచిత వ్యాఖ్యలు చేసే ముందు తమ ఇంట్లోని మహిళల గురించి ఆలోచించుకోవాలని ఆమె హితవు పలికారు. శుక్రవారం అనకాపల్లి జిల్లా నక్కపల్లి మండలం చినదొడ్డిగల్లు గ్రామంలో నిర్వహించిన బహిరంగ సభలో ఆమె ఈ మేరకు స్పందించారు.

ఈ సందర్భంగా అనిత మాట్లాడుతూ.. "నన్ను వ్యక్తిగతంగా దూషించే వారిని, అవమానించే వారిని నేను ఏమాత్రం లెక్కచేయను. గత వైసీపీ ప్రభుత్వ హయాంలో నన్ను అనేక ఇబ్బందులకు గురిచేయడమే కాకుండా, పలు ఆంక్షలు విధించారు. ప్రస్తుత అధికారంతో వారిపై కేసులు నమోదు చేసే అవకాశం ఉన్నప్పటికీ, నేను ప్రతీకార రాజకీయాలకు పాల్పడలేదు" అని స్పష్టం చేశారు. తన దృష్టి కేవలం ప్రజాసేవ, పరిపాలనపైనే ఉందని ఆమె తేల్చి చెప్పారు.

రాజకీయాలకు అతీతంగా అభివృద్ధి పనులు జరగాలని, గడిచిన రెండేళ్లలో తాను ఎలాంటి అవినీతికి తావు ఇవ్వలేదని ఆమె పేర్కొన్నారు. రాజకీయాలు కేవలం ఎన్నికల వరకే పరిమితమని, ఆ తర్వాత కేవలం సుపరిపాలనపైనే తన దృష్టి ఉంటుందని అనిత వివరించారు.