ఏపీలో రెండు విషాదాంతాలు.. కుటుంబ కలహాలతో ఏడుగురి మృతి

ఏపీలో నేడు రెండు వేర్వేరు ప్రాంతాల్లో జరిగిన హృదయ విదారక ఘటనలు తీవ్ర విషాదాన్ని నింపాయి. కుటుంబ కలహాల కారణంగా రెండు కుటుంబాలకు చెందిన ఏడుగురు ప్రాణాలు కోల్పోయారు. మృతుల్లో ఐదుగురు పసిపిల్లలు ఉండటం రాష్ట్రవ్యాప్తంగా విషాదాన్ని నింపింది. ప్రకాశం, శ్రీకాకుళం జిల్లాల్లో ఈ దారుణాలు చోటుచేసుకున్నాయి. పోలీసులు తెలిపిన వివరాల ప్రకారం రెండు ఘటనల వెనుక కుటుంబ సమస్యలే ప్రధాన కారణంగా ఉన్నాయి.

ప్రకాశం జిల్లాలో తండ్రి ఘాతుకం
ప్రకాశం జిల్లా చిమకుర్తి మండలం అగ్రహారం గ్రామంలో ఓ తండ్రి రాక్షసుడిగా మారాడు. భార్య కాపురానికి రావడం లేదన్న కోపంతో కన్నబిడ్డలనే కడతేర్చాడు. ఏకుల సుధాకర్ (35) అనే వ్యక్తి తన ముగ్గురు కుమార్తెలు గో అచ్యుత (13), పూజిత (11), లోకిత (8)లకు ఆహారంలో విషం కలిపి తినిపించాడు. వారు ముగ్గురూ మరణించారని నిర్ధారించుకున్న తర్వాత గ్రామ శివార్లలోని పొలానికి వెళ్లి ఉరి వేసుకుని ఆత్మహత్య చేసుకున్నాడు.

కొంతకాలంగా భార్య పుట్టింటికి వెళ్లి తిరిగి రాకపోవడంతో సుధాకర్ తీవ్ర మనస్తాపానికి గురయ్యాడని, ఈ క్రమంలోనే ఈ దారుణానికి ఒడిగట్టాడని పోలీసులు ప్రాథమికంగా నిర్ధారించారు. సమాచారం అందుకున్న పోలీసులు ఘటనా స్థలానికి చేరుకుని, నాలుగు మృతదేహాలను పోస్టుమార్టం నిమిత్తం తరలించారు. ఈ ఘటనపై కేసు నమోదు చేసి లోతుగా దర్యాప్తు చేస్తున్నారు.

శ్రీకాకుళంలో పిల్లలతో తల్లి ఆత్మహత్య
ఇలాంటిదే మరో విషాద ఘటన శ్రీకాకుళం జిల్లాలో చోటుచేసుకుంది. ఓ తల్లి తన ఇద్దరు పసిపిల్లలతో సహా రైలు కిందపడి ఆత్మహత్య చేసుకుంది. పలాస-తలభద్ర రైల్వే స్టేషన్ల మధ్య ట్రాక్‌పై మూడు మృతదేహాలను గుర్తించిన స్థానికులు రైల్వే పోలీసులకు సమాచారం అందించారు. మృతులను పూజ (28), ఆమె కుమారుడు కుశాంత్ (5), కుమార్తె దీక్షిత (3)గా గుర్తించారు.

శ్రీకాకుళం జిల్లా భావనపాడుకు చెందిన పూజకు ఎనిమిదేళ్ల క్రితం అదే జిల్లా చలమయ్యపేటకు చెందిన వెంకటయ్యతో వివాహమైంది. విజయవాడలో నివాసముంటున్న ఈ కుటుంబం, వేసవి సెలవుల కోసం ఇటీవలే చలమయ్యపేటకు వచ్చింది. భర్తతో విభేదాల కారణంగా నిన్న‌ ఉదయం పిల్లలతో కలిసి ఇంట్లోంచి వెళ్లిపోయిన పూజ, రాత్రంతా పలాస రైల్వే స్టేషన్‌లో గడిపినట్లు తెలిసింది. ఆ తర్వాత ఈరోజు ఉదయం పిల్లలిద్దరినీ గట్టిగా పట్టుకుని, వేగంగా వస్తున్న రైలు కింద దూకి ప్రాణాలు తీసుకుంది. తన కుమార్తె మృతికి అత్తింటి వేధింపులే కారణమని పూజ తల్లి ఆరోపిస్తున్నారు. రైల్వే పోలీసులు మృతదేహాలను సమీపంలోని ప్రభుత్వ ఆసుపత్రి మార్చురీకి తరలించి, కేసు దర్యాప్తు చేస్తున్నారు.

ఒకే రోజు రెండు వేర్వేరు జిల్లాల్లో జరిగిన ఈ ఘటనలతో ఏడుగురు ప్రాణాలు కోల్పోవడం, అందులో ఐదుగురు చిన్నారులు ఉండటం తీవ్ర ఆవేదనకు గురిచేస్తోంది.