న్యూయార్క్ టైమ్స్ స్క్వేర్లో కలకలం.. నిక్స్ ఛాంపియన్షిప్ వేడుకల వేళ పేలిన తుపాకులు!
- న్యూయార్క్ నిక్స్ బాస్కెట్బాల్ జట్టు విజయం తర్వాత నగరంలో భారీ పరేడ్
- వేడుకలు ముగిసిన కొన్ని గంటల్లోనే టైమ్స్ స్క్వేర్ వద్ద చెలరేగిన ఘర్షణ, కాల్పులు
- భయంతో పరుగులు తీసిన పర్యాటకులు, స్థానిక దుకాణాల్లో తలదాచుకున్న జనం
- వెంటనే స్పందించి నిందితుడిని చాకచక్యంగా అదుపులోకి తీసుకున్న పోలీసులు
- కాల్పుల ఘటనలో ఒకరికి తీవ్ర గాయాలు. ఆసుపత్రికి తరలింపు
కొందరు దుండగుల మధ్య జరిగిన ఘర్షణే ఈ కాల్పులకు దారితీసినట్లు ప్రాథమిక నివేదికల ద్వారా తెలుస్తోంది. నల్లటి దుస్తులు ధరించిన ఇద్దరు వ్యక్తులు రద్దీగా ఉన్న కూడలిలోకి ప్రవేశించి కాల్పులకు తెగబడ్డారు. ఈ ఘటనతో సమీపంలోని షాపింగ్ మాల్స్ తమ తలుపులను మూసివేశాయి. కాల్పుల్లో గాయపడిన ఒక వ్యక్తిని అధికారులు అత్యవసరంగా స్థానిక ఆసుపత్రికి తరలించారు.
నగరంలో పరేడ్ భద్రత కోసం అప్పటికే దాదాపు పది వేల మంది పోలీసులను మోహరించడంతో శాంతిభద్రతల విభాగం వెంటనే రంగంలోకి దిగింది. కాల్పులు జరిపి పారిపోతున్న ఒక నిందితుడిని పోలీసులు వెంటాడి మరీ పట్టుకుని అదుపులోకి తీసుకున్నారు. మిగిలిన నిందితుల కోసం గాలింపు చర్యలు ముమ్మరం చేశారు. గత వారాంతంలో కూడా టైమ్స్ స్క్వేర్ సమీపంలో జరిగిన కాల్పుల ఘటనలో పదిహేడేళ్ల వ్యక్తి గాయపడిన విషయం తెలిసిందే.
