ఓ పాకిస్థానీ టెర్రరిస్టు ద్వారా సల్మాన్ ఖాన్ నన్ను బెదిరిస్తున్నాడు: 'కాలా హిరణ్' నిర్మాత సంచలన ఆరోపణలు

బాలీవుడ్ సూపర్ స్టార్ సల్మాన్ ఖాన్ కృష్ణ జింకల వేట కేసు ఆధారంగా తెరకెక్కుతున్న 'కాలా హిరణ్' సినిమా విడుదల కాకముందే తీవ్ర వివాదాల్లో చిక్కుకుంటోంది. ఈ సినిమాను నిర్మిస్తున్న అమిత్ జానీ, తనకు పాకిస్థాన్ నుంచి హత్య బెదిరింపులు వస్తున్నాయని గురువారం సంచలన ఆరోపణలు చేశారు. ఓ ఉగ్రవాది ద్వారా సల్మాన్ ఖాన్ ఈ బెదిరింపులకు పాల్పడుతన్నాడని తీవ్ర ఆరోపణలు చేశారు. మేరకు ఆయన సోషల్ మీడియా ప్లాట్‌ఫామ్ 'ఎక్స్'లో ఓ సుదీర్ఘ పోస్ట్ పెట్టారు.

సల్మాన్ ఖాన్‌కు మద్దతుగా, పాకిస్థాన్‌కు చెందిన షహజాద్ భట్టి అనే ఉగ్రవాది తనకు ఫోన్లు, మెసేజ్‌లు చేసి బెదిరిస్తున్నాడని అమిత్ జానీ ఆరోపించారు. "డ్రోన్లు, గ్రెనేడ్లతో దాడి చేసి చంపేస్తామని హెచ్చరిస్తున్నారు. ఈ విషయంపై కేంద్ర హోం మంత్రిత్వ శాఖ, రాజస్థాన్ పోలీసులు, సీఆర్‌పీఎఫ్ అధికారులకు సమాచారం ఇచ్చాను" అని ఆయన తన పోస్ట్‌లో పేర్కొన్నారు. సల్మాన్ ఖాన్ తన 'టూల్‌కిట్' ద్వారా ఇప్పటికే వేల బెదిరింపులకు పాల్పడ్డారని ఆయన ఆరోపించారు.

"గతంలో డి-కంపెనీ పేరుతో వచ్చిన బెదిరింపులకే నేను భయపడలేదు. ఇప్పుడు ఈ పాక్ ఉగ్రవాదితో ఫోన్లు చేయిస్తున్నారు. నేను భయపడను. ఒకవేళ నన్ను హత్య చేసినా, నా తర్వాత నా టీమ్ ఈ 'కాలా హిరణ్' సినిమాను విడుదల చేస్తుంది. బిష్ణోయ్ సమాజం చేసిన పోరాటం, త్యాగాల చరిత్రను ప్రపంచానికి చూపిస్తుంది" అని అమిత్ జానీ స్పష్టం చేశారు.