ఇప్పుడు కియా కూడా ధరలు పెంచేసింది!

ప్రముఖ ఆటోమొబైల్ దిగ్గజం 'కియా ఇండియా' తమ వాహనాల ధరలను పెంచుతున్నట్లు వెల్లడించింది. ముడిసరుకు ధరలు, నిర్వహణ వ్యయం పెరగడమే ఇందుకు ప్రధాన కారణమని సంస్థ పేర్కొంది. సవరించిన ధరలు 2026 జూలై 1 నుంచి అమలులోకి రానున్నాయి. అన్ని మోడళ్లపై గరిష్ఠంగా 2 శాతం వరకు ధరలు పెరిగే అవకాశం ఉందని కంపెనీ స్పష్టం చేసింది.

పెరిగిన ఉత్పత్తి వ్యయం, విదేశీ కరెన్సీ మారకం రేట్లలో హెచ్చుతగ్గులు, ముడిసరుకుల భారంతో ధరల పెంపు అనివార్యమైందని కియా ఇండియా వివరించింది. ఈ పెంపు సంస్థ విక్రయిస్తున్న సెల్టోస్, సోనెట్, కారెన్స్, క్లావిస్, కార్నివాల్ వంటి పెట్రోల్, డీజిల్ మోడళ్లతో పాటు ఈవీ6, ఈవీ9 వంటి ఎలక్ట్రిక్ వాహనాలకు కూడా వర్తిస్తుంది. అయితే, ఎంచుకున్న మోడల్, వేరియంట్‌ను బట్టి ధరల పెరుగుదలలో వ్యత్యాసం ఉండనుంది.

పెరిగిన ఖర్చులలో అధిక భాగాన్ని సంస్థే భరిస్తూ, వినియోగదారులపై భారం తగ్గించేందుకు పెంపును కనీస స్థాయిలో ఉంచినట్లు కంపెనీ ఒక ప్రకటనలో తెలిపింది. ఇప్పటికే మారుతీ సుజుకీ, టాటా మోటార్స్, హ్యుందాయ్, బీఎండబ్ల్యూ వంటి ప్రముఖ ఆటోమొబైల్ కంపెనీలు కూడా ఇదే తరహాలో ధరలను పెంచిన సంగతి తెలిసిందే. ఈ నేపథ్యంలో, కియా వాహనాలను కొనుగోలు చేయాలనుకునే వారు జూలై 1 లోపు బుక్ చేసుకుంటే పాత ధరలకే పొందే అవకాశం ఉంది.