మూడొంతుల మెజార్టీ దిశగా ఎన్‌డీయే? ప్రతిపక్ష పార్టీల్లో కలకలం..!

లోక్‌సభలో పూర్తి ఆధిపత్యం సాధించాలన్న లక్ష్యంతో ఉన్న ఎన్‌డీయేకు ప్రతిపక్ష పార్టీల్లో చోటుచేసుకుంటున్న పరిణామాలు కలిసి వస్తున్నాయా? ఇటీవల వివిధ రాష్ట్రాల్లో కనిపిస్తున్న తిరుగుబాట్లు, పార్టీ ఫిరాయింపులు, విలీనాల చర్చలు చూస్తే అలాంటి సంకేతాలే కనిపిస్తున్నాయని రాజకీయ వర్గాలు విశ్లేషిస్తున్నాయి. ముఖ్యంగా రాజ్యాంగ సవరణలకు అవసరమైన మూడొంతుల మెజార్టీ (362 ఎంపీలు) సాధించే దిశగా అధికార కూటమి క్రమంగా ముందుకు వెళ్తోందన్న చర్చ జోరందుకుంది.

2024 లోక్‌సభ ఎన్నికల్లో ఉత్తరప్రదేశ్‌, మహారాష్ట్ర, పశ్చిమ బెంగాల్‌, తమిళనాడు వంటి కీలక రాష్ట్రాల్లో బీజేపీ ఆశించిన ఫలితాలు రాలేదు. దీంతో బీజేపీ సొంతంగా 240 స్థానాలకే పరిమితమైంది. ఎన్‌డీయే బలం 293కు చేరినా, మూడొంతుల మెజార్టీకి అవసరమైన సంఖ్యకు ఇంకా దూరంగానే నిలిచింది. అయితే ఎన్నికల తర్వాత రాజకీయ సమీకరణాలు వేగంగా మారుతున్నాయి.

బెంగాల్‌లో తిరుగుబాటు
పశ్చిమ బెంగాల్‌లో తృణమూల్‌ కాంగ్రెస్‌కు చెందిన కొందరు ఎంపీలు పార్టీపై అసంతృప్తితో ఉన్నట్లు ప్రచారం జరుగుతోంది. వీరిలో 20 మంది ఎంపీలు విడిపోయి కొత్త రాజకీయ వేదికలో చేరే అవకాశాలపై చర్చ నడుస్తోంది. ఈ వర్గం ఎన్‌డీయేకు మద్దతు ఇచ్చే అవకాశముందని రాజకీయ వర్గాలు భావిస్తున్నాయి. అదే జరిగితే అధికార కూటమి సంఖ్య మరింత పెరిగే అవకాశం ఉంది.

మహారాష్ట్రలో శివసేన(యూబీటీ)కు షాక్‌
మహారాష్ట్రలో ఉద్ధవ్‌ ఠాక్రే నేతృత్వంలోని శివసేన(యూబీటీ)లోనూ సంక్షోభం నెలకొంది. పార్టీకి చెందిన ఆరుగురు లోక్‌సభ సభ్యులు ప్రత్యేక గ్రూపుగా గుర్తించాలని స్పీకర్‌కు లేఖ రాయడం కలకలం రేపింది. దీనిపై స్పందించిన పార్టీ నేత సంజయ్‌ రౌత్‌.. ఎంపీలను కొనుగోలు చేసే ప్రయత్నాలు జరుగుతున్నాయని ఆరోపించారు. ఒక్కో ఎంపీకి భారీ మొత్తాలు ఆఫర్‌ చేశారని కూడా వ్యాఖ్యానించారు. ఈ తిరుగుబాటు నేతలు ఎన్‌డీయేకు దగ్గరవుతారన్న ఊహాగానాలు వినిపిస్తున్నాయి.

ఉత్తరప్రదేశ్‌లోనూ ఊహాగానాలు
ఉత్తరప్రదేశ్‌లో సమాజ్‌వాదీ పార్టీలో చీలిక వస్తుందంటూ ప్రచారం సాగుతోంది. రాష్ట్ర మంత్రి ఓం ప్రకాశ్‌ రాజ్‌భర్‌ చేసిన వ్యాఖ్యలు దీనికి మరింత ఊతమిచ్చాయి. అయితే ఎస్పీ అధ్యక్షుడు అఖిలేశ్‌ యాదవ్‌ ఈ ప్రచారాన్ని ఖండించారు. పార్టీ ఐక్యంగానే ఉందని స్పష్టం చేశారు.

తమిళనాడులో కొత్త లెక్కలు
తమిళనాడులో డీఎంకే-కాంగ్రెస్‌ సంబంధాల్లో దూరం పెరుగుతోందన్న వార్తలు కూడా రాజకీయంగా ఆసక్తి రేకెత్తిస్తున్నాయి. ఈ పరిస్థితిని బీజేపీ అవకాశంగా మలుచుకునే ప్రయత్నాలు చేస్తోందన్న ప్రచారం జరుగుతోంది. అయితే దీనిపై డీఎంకే అధికారికంగా స్పందించలేదు.

రాజ్యసభలోనూ మారుతున్న సమీకరణాలు
లోక్‌సభతో పాటు రాజ్యసభలోనూ ఎన్‌డీయే బలం పెరిగే అవకాశాలు కనిపిస్తున్నాయి. తాజా ఎన్నికల తర్వాత అధికార కూటమి సంఖ్య మరింత పెరుగుతుందని అంచనా. బెంగాల్‌లో ఖాళీ అయిన కొన్ని స్థానాలు కూడా బీజేపీ ఖాతాలో పడే అవకాశం ఉందన్న విశ్లేషణలు వినిపిస్తున్నాయి.

అయితే ప్రస్తుతం ఇవన్నీ రాజకీయ చర్చల దశలోనే ఉన్నాయి. ప్రతిపక్ష పార్టీల్లో అసంతృప్తి, తిరుగుబాట్లు నిజంగా ఎన్‌డీయేకు సంఖ్యాబలం పెంచుతాయా? లేక ఇవి కేవలం ఊహాగానాలుగానే మిగిలిపోతాయా? అన్నది రానున్న రోజుల్లో తేలనుంది.