అమెరికాలో లీటర్ పాలు రూ.450, కప్ టీ రూ.900... బిత్తరపోయిన పాల వ్యాపారి!

సోషల్ మీడియాలో ఎప్పుడు ఏది వైరల్ అవుతుందో చెప్పడం కష్టం. తాజాగా అమెరికాలో నివసించే ఓ భారతీయ వ్యాపారవేత్తకు, భారత్‌లోని ఓ సాధారణ పాల వ్యాపారికి మధ్య జరిగిన సంభాషణ నెటిజన్లను విపరీతంగా ఆకట్టుకుంటోంది. అమెరికాలో పాలు, టీ ధరల గురించి తెలుసుకున్న ఆ పాల వ్యాపారి ఇచ్చిన రియాక్షన్, ఆ వెంటనే అతడు ఆలోచించిన బిజినెస్ ప్లాన్ అందరినీ నవ్విస్తోంది. ఈ సరదా సంభాషణకు సంబంధించిన వీడియో ఇప్పుడు ఇంటర్నెట్‌లో చక్కర్లు కొడుతోంది.

అసలేం జరిగింది?
ప్రభాకర్ ప్రసాద్, బీహార్‌కు చెందిన యువకుడు. ప్రస్తుతం అమెరికాలోని లాస్ ఏంజెల్స్‌లో 'చాయ్‌గయ్' (Chaiguy) ' పేరుతో విజయవంతంగా టీ వ్యాపారం నిర్వహిస్తున్నాడు. ఇటీవల భారత్‌కు వచ్చిన ఆయన, తనకు పాలు సరఫరా చేసే స్థానిక వ్యాపారితో సరదాగా ముచ్చటించాడు. ఈ సందర్భంగా కాలిఫోర్నియాలో ఒక లీటర్ పాలు కొనాలంటే సుమారు రూ. 450 అవుతుందని చెప్పాడు. ఈ మాట విన్న పాల వ్యాపారి ఒక్కసారిగా బిత్తరపోయాడు. భారత్‌లో లీటర్ పాలు రూ. 60-70కి దొరుకుతుండగా, అక్కడ అంత ధర ఏంటని ఆశ్చర్యపోయాడు.

ఆ షాక్ నుంచి తేరుకోకముందే, ప్రభాకర్ మరో విషయం చెప్పాడు. తాను ఆ పాలతో టీ తయారు చేసి, లాస్ ఏంజెల్స్‌లో ఒక్కో కప్పును 10 డాలర్లకు, అంటే భారత కరెన్సీలో సుమారు రూ. 900కి అమ్ముతానని చెప్పడంతో పాల వ్యాపారి కళ్లలో ఆశ్చర్యం రెట్టింపయింది.

షాక్ నుంచి బిజినెస్ ప్లాన్‌లోకి...
అయితే, ఆ పాల వ్యాపారి ఎక్కువసేపు షాక్‌లో ఉండిపోలేదు. వెంటనే అతనిలోని వ్యాపారవేత్త బయటకు వచ్చాడు. ధరల తేడాపై ఆలోచించడం పక్కనపెట్టి, అవకాశాల గురించి ఆలోచించడం మొదలుపెట్టాడు. "అంత ధర ఉంటే, ఇక్కడి నుంచే పాలు పంపించొచ్చు కదా? రిఫ్రిజిరేటర్‌లో పెట్టి పంపిస్తే పాలు తాజాగా ఉంటాయి కదా?" అంటూ అమెరికాకు పాలు ఎగుమతి చేసే అవకాశాలను అన్వేషించడం మొదలుపెట్టాడు. అతని రియాక్షన్ చూసి ప్రభాకర్ ప్రసాద్ కూడా నవ్వు ఆపుకోలేకపోయాడు.

"బీహారీ పాల వ్యాపారి నమ్మలేకపోయాడు... కాలిఫోర్నియాలో చాయ్‌గయ్ లీటర్ పాలకు 450 రూపాయలు చెల్లిస్తున్నాడు" అనే క్యాప్షన్‌తో ఈ వీడియోను ఇన్‌స్టాగ్రామ్‌లో పోస్ట్ చేయగా, అది క్షణాల్లో వైరల్ అయింది. "పాల వ్యాపారి షాక్ దశను దాటేసి, నేరుగా అంతర్జాతీయ విస్తరణ ప్రణాళికల్లోకి వెళ్లిపోయాడు" అంటూ నెటిజన్లు సరదాగా కామెంట్లు పెడుతున్నారు.

ఈ సంభాషణలో భాగంగా అమెరికాలో జీవితం ఎలా ఉంటుందని కూడా ఆ వ్యాపారి ప్రభాకర్‌ను అడిగాడు. దానికి ప్రభాకర్ బదులిస్తూ.. అమెరికాలో అవకాశాలు, సంపాదన బాగున్నప్పటికీ, జీవితం చాలా వేగంగా ఉంటుందని, ఖర్చులు కూడా అదే స్థాయిలో ఉంటాయని, అక్కడ నిత్యం విభిన్నమైన సవాళ్లు ఎదురవుతాయని వివరించాడు. మొత్తానికి ఈ సాధారణ సంభాషణ ఇప్పుడు సోషల్ మీడియాలో అద్భుతమైన వినోదాన్ని పంచుతోంది.

వీడియో కోసం ఇక్క‌డ క్లిక్ చేయండి