నెలకు రూ.1.44 లక్షల జీతం.. చేతిలో చిల్లిగవ్వ ఉండటంలేదు!

మెట్రో నగరాల్లో భారీ వేతనాలు అందుకుంటున్నప్పటికీ, యువ ఉద్యోగులు తీవ్ర ఆర్థిక ఒత్తిడిని ఎదుర్కొంటున్నారనడానికి తాజా ఘటన నిదర్శనంగా నిలుస్తోంది. గురుగ్రామ్‌కు చెందిన ఓ 27 ఏళ్ల సాఫ్ట్‌వేర్ ఇంజనీర్, నెలకు సుమారు రూ.1.44 లక్షల వేతనం పొందుతున్నా ఏమాత్రం పొదుపు చేయలేకపోతున్నానంటూ సోషల్ మీడియా వేదిక 'రెడ్డిట్‌'లో పెట్టిన పోస్ట్ ప్రస్తుతం వైరల్‌గా మారింది.

'ఫ్రూగల్ ఇండ్' అనే పేరుతో తన ఆవేదనను పంచుకున్న ఆ టెక్కీ, తన నెలవారీ ఖర్చుల వివరాలను వెల్లడించాడు. తాను కొనుగోలు చేసిన ఒక ప్లాట్‌కు ఈఎంఐ రూపంలో రూ.44,000, నివసిస్తున్న ఇంటి అద్దెకు రూ.25,000 చెల్లిస్తున్నట్లు తెలిపాడు. నిత్యావసరాలు, ఇంధనం, ఇతర ఖర్చులతో కలిపి ప్రతి నెలా సుమారు రూ.1.1 లక్షల వరకు వ్యయమవుతోందని, దీంతో పొదుపు చేసే అవకాశం ఉండటం లేదని పేర్కొన్నాడు. దీనికి తోడు వాహనాల మరమ్మతులు, బీమా, వైద్యం అవసరాల వంటి అనూహ్య ఖర్చులు రావడంతో స్నేహితుల నుంచి రూ.2.25 లక్షలు వరకు అప్పు చేయాల్సి వచ్చిందని ఆయన వివరించారు.

ఇటీవలే తనకు వివాహమైందని, భార్యతో పాటు తల్లిదండ్రుల బాధ్యతలను కూడా చూసుకోవాల్సి ఉందని ఆ టెక్కీ తెలిపాడు. సహోద్యోగులు తనకంటే ఎక్కువ సంపాదిస్తున్నారని తెలిసినప్పుడు తీవ్ర ఒత్తిడికి గురవుతున్నట్లు పేర్కొన్నాడు. భవిష్యత్తులో జీతాల పెంపు, బోనస్‌లపై ఆశలు ఉన్నప్పటికీ, ప్రస్తుత ఆర్థిక పరిస్థితి అత్యంత ఇబ్బందికరంగా ఉందని ఆవేదన వ్యక్తం చేశాడు.

ఈ పోస్ట్‌పై ఆన్‌లైన్‌లో విస్తృత చర్చ జరుగుతోంది. గురుగ్రామ్ వంటి నగరాల్లో విపరీతంగా పెరుగుతున్న జీవన వ్యయం, గృహ రుణాల భారం, జీవనశైలి అంచనాలు వేతనాల పెరుగుదలను మించిపోతుండటమే ఇందుకు ప్రధాన కారణమని పలువురు అభిప్రాయపడుతున్నారు.